Գերմանիայի իշխող կուսակցության քարտուղարը պաշտպանել է Հայոց ցեղասպանությունը ճանաչող բանաձևը

Գերմանիայի իշխող Քրիստոնեա-դեմոկրատական կուսակցության գլխավոր քարտուղար Պիտեր Թաուբերը հայտարարել է, որ Հայոց ցեղասպանությունը ճանաչող Բունդեսթագի բանաձևից հետքայլ չի լինելու:

Ինչպես հաղորդում է «Արմենպրես»-ը, այս մասին Թաուբերը գրառում է կատարել ֆեսյբուքյան իր էջում:

«Օսմանյան կայսրությունում իրականացված Հայոց ցեղասպանությունը ճանաչող Գերմանիայի Բունդեսթագից բանաձևից որևէ հետ քայլ չի արվելու, քանի որ բանաձևը եղել է ու շարունակում է ճշմարիտ լինել: Որպես Քրիստոնեա-դեմոկրատական միության քարտուղար, որպես Բունդեսթագի անդամ, ինչպես նաև որպես պատմաբան` ես ամբողջությամբ այդ բանաձևի հետևում եմ կանգնած: Դա ապացուցում է, որ Spiegel-ի տեղեկությունը սխալ է»,- հայտնել է Թաուբերը:

Գերմանական Spiegel պարբերականը հոդված է հրապարակել, որտեղ հայտնել է, որ Գերմանիայի արտաքին գործերի նախարարությունն ու կանցլերի գրասենյակը համաձայնության են եկել, որ կառավարության խոսնակ Շթեֆեն Զայբերտը մամուլի առաջ ելույթ ունենա և հայտարարի, որ կառավարությունն իրեն հեռու է պահում Բունդեսթագի կողմից ընդունված Հայոց ցեղասպանությունը ճանաչող բանաձևից: Մասնավորապես, կառավարության խոսնակը պետք է հայտարարի, որ Բունդեսթագի բանաձևը չունի կառավարությանը պարտադրող բնույթ:

Նախքան որոշման ընդունումը Բեռլինում քննարկումներ են տարվել, թե ով պետք է հանդես գա համապատասխան հայտարարությամբ: Spiegel-ի հաղորդմամբ` արտաքին գործերի նախարար Ֆրանկ-Վալտեր Շտայնմայերը չի ցանկացել այդ դերը վերցնել իր վրա: Կանցլեր Մերկելի կողմից նման քայլը ևս հնարավոր չէր, քանի որ դա կարող էր դիտարկվել որպես զիջում Էրդողանի առաջ: Ի վերջո որոշվել է, որ մամուլի առաջ կխոսի կառավարության խոսնակ Զայբերտը:

Հայտնի է նաև, որ Գերմանիայի կանցլեր Անգելա Մերկելը հայտնել է իր Քրիստոնեա-դեմոկրատական կուսակցության խորհրդարանական խմբակցության ղեկավար Վոլքեր Քաուդերին, որ չի հեռացնում իրեն Հայոց ցեղասպանությունը ճանաչելու մասին Բունդեսթագի բանաձևից: Հանդիպմանը մասնակցած աղբյուրները հայտնել են, որ Քրիստոնեա-դեմոկրատական կուսակցության խորհրդարանական խմբակցության ղեկավարը տեղեկացրել է, թե իր հետ զրույցում Գերմանիայի կանցլերը հաստատել է իր դիրքորոշումը Հայոց ցեղասպանությունը ճանաչող բանաձևի վերաբերյալ:

Քաուդերը նաև հայտնել է, որ Մերկելն ասել է, թե նախքան Բունդեսթագում բանաձևի քվեարկության դրվելը կուսակցության անդամների հանդիպմանն ինքը կողմ է քվեարկել դրան: