Ի՞նչ նոր ֆիլմում են նկարահանվում Սոս Ջանիբեկյանը, Տաթև Հովակիմյանը, Հրանտ Թոխատյանը, Միքայել Պողոսյանն և այլք

Blognews.am-ը գրում է.

«Մի երկրաշարժի պատմություն». այսպես է կոչվում ռուսական կինոարտադրության այն ֆիլմը, որ պատմելու է 1988 թվականի դեկտեմբերի 7-ին Գյումրիում տեղի ունեցած երկրաշարժի մասին: Ֆիլմում իրենց մասնակցությունն են ունենալու նաև հայ դերասանները: BlogNews.am-ը զրուցել է ֆիլմի պրոդյուսեր Ռուբեն Դիդիշյանի, ինչպես նաև գլխավոր դերակատարուհիներից մեկի՝ Տաթև Հովակիմյանի հետ:

«Այս թեմայի հանդեպ ես անտարբեր չեմ, քանի որ ինչ-որ չափով ինձ համարում եմ այս իրադարձությունների մասնակից: 1988 թվականին ես ապրում էի Երևանում, դեպքի հաջորդ օրը մենք հարևանների հետ նստեցինք մեքենա և գնացինք Գյումրի: Երբ քաղաք մտանք, կանգնեցինք առաջին իսկ քանդված տան մոտ և սկսեցինք հավաքել փլատակները, ցավոք, ողջ մարդկանց չգտանք: Այդ ամենն իմ միջով անցել է, այդ ամբողջ էմոցիաները և ցավը դեռ ապրում են իմ մեջ»,-պատմեց Ռուբենը:

Ֆիլմի իրադարձությունները զարգանում են Գյումրիում, երբ երկրաշարժի ժամանակ հանդիպում են գլխավոր հերոսները՝ ճարտարապետ Անդրեյ Բերեժնոյը և երիտասարդ Ռոբերտ Մելքոնյանը: Ճակատագրի բերմամբ սա նրանց երկրորդ հանդիպումն էր. մի քանի տարի առաջ Բերեժնոյի պատճառով ավտովթարի զոհ էին դարձել Ռոբերտի ծնողները: Կրկին ճակատագրի հեգնանքով նրանք երկուսն էլ հայտնվում են նույն փրկարարական թիմում, բայց անմիջապես չեն ճանաչում իրար:

Ֆիլմում իրենց մասնակցությունն են ունենալու դերասաններ Կոնստանտին Լավրենկոն, Մարիա Միրոնովան, Դանիլ Իզոտովը, Արտեմ Բիստրովը, Սաբինա Ախմեդովան, Վիկտոր Ստեփանյանը, Սոս Ջանիբեկյանը, Տաթև Հովակիմյանը, Հրանտ Թոխատյանը, Միքայել Պողոսյանը: Դերասանների քասթինգն անցկացվել է ինչպես Մոսկվայում, այնպես էլ Հայաստանում, այն տևել է հինգ ամիս։ «Հայաստանում փորձել ենք ավել քան 300 դերասանների, իսկ Մոսկվայում մոտ վաթսուն հոգու՝ չհաշված երեխաներին,- խոստովանում է Ռուբենը,- ընտրությունը բավականին բարդ էր, քանի որ գլխավոր նպատակն էր հավաքել դերասանական լավ թիմ, և կարծում եմ՝ մեզ դա հաջողվեց: Դերասանական կազմից շատերին ծանոթ եմ, նաև ծանոթ եմ նրանց աշխատանքին, ոմանց հետ էլ ծանոթացել եմ քասթինգի ժամանակ և, անկեղծ ասած, տպավորված եմ»:

Ֆիլմի նկարահանումները կսկսվեն Մոսկվայում հոկտեմբերի կեսերից, իսկ արդեն ձմռանը կշարունակվեն Գյումրիում: Ռուբենը նշում է, որ առաջին հերթին ուզում են էմոցիոնալ ֆիլմ անել, անել լավ կինո, որ մարդկանց անտարբեր չթողնեն։ «Սկզբնական փուլում ֆիլմն ուներ երկու սցենար, այն մեզ դուր էր գալիս, բայց այն, այսպես ասած, շատ հայկական էր: Մենք կես տարի աշխատել ենք սցենարի վրա, որպեսզի այն հետաքրքիր դարձնենք ռուս հանդիսատեսի համար: Ինձ թվում է՝ մենք հասել ենք իդեալական բալանսի, երբ ֆիլմը կարող է հետաքրքիր լինել և՛ հայ, և՛ ռուս հանդիսատեսին: Ինձ համար ամենամեծ խնդիրն այն էր, ինչ մենք ուզում էինք ասել հայերին: Ես հիմա չեմ պատմի այն հիմնական մեսիջի մասին, որն, ինչպես ինձ է թվում, գտել ենք: Նայեք ֆիլմը, տա Աստված՝ այն ստացվի, և այդ ժամանակ կարող ենք շփվել և կարծիքներով փոխանակվել: Բայց սա ինձ համար շատ պատասխանատու խնդիր է, քանի որ դեռ վերքս ցավում է: «Մի երկրաշարժի պատմություն» ֆիլմը նկարահանվելու է ռուսերեն լեզվով, բայց մենք պարտադիր կթարգմանենք նաև հայերեն, և հուսով եմ՝ այն կցուցադրվի նաև Երևանում»,-եզրափակեց Ռուբեն Դիդիշյանը։

Տաթև Հովակիմյանը նշում է, որ նրան զանգահարեցին և կանչեցին քասթինգի, որից հետո էլ ընտրվեց գլխավոր դերերից մեկի համար. «Շատ չեմ ուզում մանրամասնել իմ կերպարը, միայն կնշեմ, որ այն կապվում է 1988 թվականի երկաշարժի հետ: Ես արդեն երկրորդ անգամ եմ խաղում ֆիլմում, որը հիմնված է իրական իրադարձությունների վրա: Հեշտ չէ, քանի որ յուրաքանչյուր անգամ պատասխանատվությունն ավելի ու ավելի  մեծ է, քանի որ այստեղ շատ զոհեր են եղել, և լավ գիտենք՝ ինչպես են ապրել մարդիկ: Այս ֆիլմում խաղալը ևս մեծ պատասխանատվություն է ինձ համար, ինչպես «Անավարտ թռիչք»-ում»:

Սա Տաթևի մասնակցությամբ արդեն արդեն երրորդ ֆիլմն է: Հարցին՝ արդյո՞ք դերասանուհին կկարողանա համեմատել հայկական և ռուսական կինոարտադրության ֆիլմերը, Տաթևը պատասխանեց. «Իհարկե, հայկական ֆիլմերից էլ երբեք չեմ բողոքել և անդադար բողոքել չեմ սիրում: Այստեղ էլ շատ լավ ֆիլմեր ստեղծվում են, իսկ ռուսական շուկան սիրել եմ, նաև թատրոնը և շատ ուրախ եմ, որ կաշխատեմ այս ֆիլմում, բայց դա չի նշանակում, որ Հայաստանում վատ են աշխատում»:

Նյութը՝ Սիրանուշ Գրիգորյանի