Life.panorama.am-ը գրում է.
Մեր մայրաքաղաքը 2797 տարեկան է: Այսօր ողջ քաղաքը տոնում է Էրեբունի-Երևանի ծննդյան օրը, սա տոն է, որը հատկապես մայրաքաղաքի բնակիչների համար խորհրդանշական և շատ կարևոր է: Life.panorama.am-ը շնորհավորելով բոլորին՝ առաջարկել է հայտնի հայերին կիսվել իրենց շնորհավորական խոսքով:
Դերասանուհի Անի Քոչարյանը, ով բոլորովին վերջերս է վերադարձել ԱՄՆ-ից՝ իր շնորհավորական խոսքում նկատեց, որ Երևանից առավել տաք ու գեղեցիկ քաղաք իր համար գոյություն չունի. «Ինձ համար մեր քաղաքը ամենագեղեցիկն է, ամենալավն է, ամենաջերմ ու տաքն է, դրանում կրկին համոզվեցի, երբ վերջերս վերադարձա Միացյալ նահանգներից. որքան մարդ լինում է օտարության մեջ, այնքան հասկանում է, թե ինչ ունի՝ հանձինս մեր քաղաքի: Ես շատ եմ սիրում Երևանը և շատ եմ ուզում, որ մեր քաղաքում մարդիկ լավ ապրեն, ապրեն այնքան գեղեցիկ, որքան գեղեցիկ է մեր քաղաքը, ուզում եմ, որ բոլորը ժպտան, իհարկե, մեզ մոտ կարծես բոլորն էլ ժպտում են, բայց, այնուամենայնիվ, մարդկանց աչքերում կա տխրություն, իսկ ես ուզում եմ, որ այդ տխրությունը վերանա և այն ժպիտը, որ կա մարդկանց դեմքերին, լինի լիաթոք, ի սրտե և ոչ ուղղակի»,- նշեց դերասանուհին:
Դուդուկահար Կամո Սեյրանյանն էլ բարձր տրամադրությամբ նշեց. «Շնորհավորում եմ բոլոր երևանցիներին, շատ եմ ուզում, որ երևանցիները և առհասարակ մեր հայրենակիցները իսկապես իրենց երջանիկ զգան, աշխարհի ամենալավն ու բարին մեր հայերին, ես ի սրտե ուզում եմ, որ մենք ապրենք խաղաղ ու անհոգ»: Ի դեպ, Կամո Սեյրանյանը նշեց, որ վաղը Էրեբունի թանգարանի առջև իր սիրելի հայրենակիցների համար ելույթ կունենա:
Երգչուհի Նառան էլ իր շնորհավորական խոսքում այսպես արտահայտվեց. «Բոլորիս շնորհավորում եմ այս գեղեցիկ տոնի կապակցությամբ, ուզում եմ ցանկանալ բոլորին առողջություն և խաղաղ երկինք, շատ եմ ցանկանում, որ միշտ բոլորս ունենանք նպատակ և փորձենք հասնել այդ նպատակներին, և ինչ էլ, որ լինի, երբեք չհիասթափվենք և չհուսահատվենք ոչնչից»:
Արամոն ևս միացավ շնորհավորանքներին, բայց կարճ արտահայտվեց. «Շնորհավորում եմ բոլորին, մեր երևանցիներին ցանկանում եմ երջանկություն, առողջություն և ամենայն բարիք»:
Անուշ Արշակյանն էլ իր շնորհավորական խոսքը հետաքրքիր կերպ ձևակերպեց. «Ես որպես երգչուհի, ով շատ է ճամփորդել, կարող եմ ասել, որ մեր քաղաքը ոչ միայն յուրահատուկ ու հարազատ է, այլ այն ամենալավն է, Երևանը իսկապես աշխարհի ամենալավ քաղաքն է, որովհետև այստեղ ապրում են նրանք, ում դու սիրում ես, և նրանք, ովքեր քեզ են սիրում, այստեղ ապրում են նրանք, ովքեր քեզ փրկել են: Բացի այս, մեր քաղաքը կառուցել է մեկն, ով աշխարհի ամենամեծ և ամենաամենակ երազողն է եղել, խոսքը Ալեքսանդր Թամանյանի մասին է, նա արել է անհնարինը և փաստորեն մենք ապրում ենք նրա երազանքում, իսկ մեծատառով երազող մարդիկ հենց այդպիսիք են լինում: Այնպես որ ես կմաղթեմ մեր երևանցիներին, որպեսզի չմոռանան, թե ով է մեր այսօրվա քաղաքը կառուցել, չհուսահատվեն երբեք, որովհետև աշխարհը կամ սրիկաներն են փոխում, կամ երազողները, իսկ մենք երկրորդներին ենք պատկանում: Պետք է չվախենալ փոխել աշխարհը, այնպես ինչպես Ալեքսանդր Թամանյանն արեց, ով մեր այսօրվա քաղաքը վերակառուցեց 100 տարի առաջ»:
Հաղորդավար, երգիչ Սամվել Գրիգորյանը շնորհավորեց ոչ միայն երևանցիներին, այլև Երևանի հյուրերին. «Քանի որ ես Էջմիածնից եմ, լինելով ոչ երևանցի՝ Երևանը լիարժեք համարում եմ իմ քաղաքը, այստեղ անցել են իմ կյանքի լավագույն տարիները և դրա համար էլ այն դարձել է ինձ համար հարազատ: Բոլոր երևանցիներին և Երևանի իմ նման հյուրերին շնորհավորում եմ այս տոնի կապակցությամբ, մաղթում եմ, որպեսզի սիրեն մեր քաղաքը ինչպես մեր տունը, որովհետև, եթե մենք սիրենք մեր քաղաքը, ապա մեր քաղաքն էլ նույնկերպ մեզ կսիրի. ուզում եմ մաքուր պահենք մեր քաղաքը, էլ ավելի գեղեցկացնենք, սիրենք ու նվիրված լինենք մեր Երևանին»:
