Արմենչիկի մենահամերգին հանրությանը «հաչացող շուն» են անվանել

Արմենչիկին վաստակավոր արտիստի կոչում տալու շուրջ ծավալված կրքերը կարծես թե չեն հանդարտվում: Այս անգամ «կրակի վրա յուղ են լցնում» ամերիկաբնակ հայ երգչի «կողմնակիցները»` Արմենչիկի մենահամերգի ժամանակ նրան դեմ արտահայտվողներին «հաչացողներ» անվանելով: Այս առիթով ստորև ներկայացնում են Լոս Անջելեսի մեր արտահաստիքային թղթակցի անդրադարձը, միաժամանակ պատրաստակամություն հայտնելով` հարթակ տրամադրել նաև հակառակ կողմին:

Հոկտեմբերի 9-ին, «MICROSOFT» համերգասրահում, որտեղ տեղի էր ունենում վերջերս «վաստակավորի» կոչում ստացած Արմենչիկի մենահամերգը` բեմից վիրավորական խոսքեր են հնչել: Անպարկեշտ արտահայտություններն ուղղված են եղել հանրության, լրագրողների, արվեստագետների այն մեծ հատվածին, որը տպագիր մամուլում և ֆեյսբուքում իր դժգոհությունն էր հայտնել Արմենչիկին՝ վաստակավորի կոչում տալու առիթով:

Բացելով մենահամերգը, «Դեմք» շոուն հանդես է եկել այսպիսի հայտարարությամբ .«....Ժողովուրդ ջան, Արմենչիկը այլևս շուն չի պահելու, կարա՛ք ասեք ինչի՞»: Ի պատասխան, դահլիճն արձագանքել է.«Ինչի՜ ինչի՜ ...»: «Դեմք» շոուն էլ բացատրել է, թե ինչու . «...որովհետև Արմենչիկի վաստկավորի կոչման համար ֆեյսբուքում այնքան շատ հաչացին, որ Արմենչիկը որոշել է այլևս շուն չպահել»,- ցինիկաբար հայտարարել է սույն ,,Դեմքը,,: Անգամ անվանարկել են հայտնի ու տաղանդավոր երգչուհուն, ՀՀ ԱԺ պատգամավորին` Շուշան Պետրոսյանին, ով նույնպես կարծիք էր արտահայտել: Դահլիճում ներկա գտնվողները զարմացել են ու զայրացել, թե ինչպե՞ս կարելի է հանրությանը հաչացող շուն անվանել:

Անցել է մի քանի օր, սակայն Լոս Անջելեսում դեռեւս շարունակում են քննարկել այս թեման: «Վաստակավորի» կոչում ստացած Արմենչի՛կ, ամիսներ շարունակ պատրաստվելով քո մենահամերգին, ինչպես կարող էիր բեմահարթակը տրամադրել «Դեմք» շոուի «դեմք» տղաներին՝ վիրավորելու հանրությանը: Նրանք, անգամ, օգտվելով իրենց տրված հնարավորությունից, «MICROSOFT»-ի բեմահարթակը օգտագործեցին նոյեմբերի 8 -ին իրենց ներկայացումը գովազդելուն, այն դեպքում, երբ ամիսներ առաջ քաջատեղյակ լինելով տաղանդավոր երգիչներ Պապին Պողոսյանի և Գագիկ Բադալյանի մենահամերգի մասին՝ նույն օրն իրենց ներկայացումն են դրել: «Դեմքի» տղաները կարծում են,որ իրենք, իրոք, «դեմք» են և կարող են անտեսել արվեստի մեջ մեծ վաստակ ունեցող Պապին Պողոսյանին՝ նույն օրը դիտավորյալ դնելով իրենց ներկայացումը: «Դեմք» շոու, հանդիսատեսը ձեզ հարց է ուղղում, ինչպե՞ս ներկայանա ձեր ներկայացմանը, երբ նույն հանրությանը բեմահարթակից առանց ամոթի հաչող շուն եք անվանել: Եկե՛ք գումարենք ու հանե՛նք ձեր արարքը: Ի՞նչ կստացվի: Կստացվի այն, որ ձեր ներկայացմանը ներկա կգտնվեն միայն այն մարդիք, ովքեր կընդունեն հանրությանը «հաչացող շուն» անվանելու ձեր տարբերակը:

Կատարվածի համար հանրությունը սպասում է Արմենչիկի, նրա մենահամերգի պրոդուսորի, գեղ. ղեկավարի պարզաբանմանը, չէ՞ որ նրանց թույլտվությամբ և թողտվության պատճառով է «Դեմք» շոուի կողմից հանրությանը նման վիրավորանք հասցվել: Դիմում եմ բոլորին, ի վերջո հիմա հանրությունն է Շուն, թե՝ Արմենչիկին վաստակավորի կոչում տալու հարցով Բարեխոսողները, կամ էլ նրան վաստկավորի կոչում Տվողը....

Ռուզան Ավետիսյան, ԱՄՆ