Սարգիսի ու Էթերիի առումով դեռևս ոչինչ չեմ կարող ասել, բայց հավանական է, որ այո, նրանք լինելու են. «Բախտաբերի» ռեժիսորը նոր սերիալի և կերպարների մասին

Aysor.am-ը գրում է.

«Բախտաբեր» սերիալի ավարտից հետո հեռուստադիտողը շարունակում է հետաքրքրվել, թե խոստումների համաձայն՝ ի՞նչ է պատրաստում ստեղծագործական խումբը հեռուստադիտողի համար: « Դեկտեմբերի կեսերին հեռուստադիտողը «Բախտաբեր» ստեղծագործական անձնակազմի կողմից նոր հեռուստանախագիծ կունենա՝ սիրված դերակատարներով: Ընդգրկված կլինի «Բախտաբերի» դերասանների գրեթե 99 տոկոսը… Սցենարիստ Անահիտ Մխիթարյանը նոր ու հետաքրքիր լուծումներ է գտել և այս պրոյեկտը նախորդից շատ ավելի լավն է լինելու, ըստ իս»,-Aysor.am-ի հետ զրույցում վստահեցրեց ռեժիսոր Վահե Սայանը:

Մեր այն հարցին, թե արդյոք նոր նախագծում հնաբնակներից կշարունակեն մնալ Սոս Ջանիբեկյանը, Սարգիս Գրիգորյանն ու Էթերի Ոսկանյանը՝ պատասխանեց.«Այնպես չի, որ պարտավորված ենք, որ պետք է գլխավոր դերակատարները միշտ ու բոլոր նախագծերում լինեն: Դա նաև հեռուստադիտողին կձանձրացնի: Նրանք կերպարային մասով իրենց գործը գերազանց կատարել են «Բախտաբերում» ու հիմա ես, որպես ռեժիսոր, կարիք չունեմ աշխատել նույն մարդկանց հետ: Եվ հետո, Սոս Ջանիբեկյանն այժմ բոլորովին այլ պրոյեկտում է զբաղված, իսկ Սարգիսի ու Էթերիի առումով դեռևս ոչինչ չեմ կարող ասել, բայց հավանական է, որ այո, նրանք լինելու են»:

«Բախտաբեր» սերիալն իր տեսակով առանձնացավ՝ հանգուցալուծումը գտնելով ֆիլմային տարբերակում, որին մինչ այսօր հեռուստադիտողը ծանոթ չէ: Արդյոք այս նոր նախագիծը ևս նման ինքնատիպություն կուննա: «Դեռ շուտ է այդ մասին խոսել: Մենք մատուցում ենք այն, ինչը հետաքրքիր է: Չեմ կարծում, որ «Բախտաբերի» վերջն անսպասելի էր, նույնիսկ կռահելի էր… Գաղափարը հեռուստադիտողների առաջարկով է եղել, իրենք են ցանկացել, որ ամփոփիչ մեկ սերիայով ավարտվի: Նման կարծիքներ շատ ենք լսել: Եվ հետ, չմոռանանք, որ հեռուստատեսությունը կոմերցիա է և այդ մասով պետք է մի քիչ էլ շահավետ լինի ստեղծագործական խմբի համար: Դերասաններն էլ են «հավեսով» են գործի գալիս, եթե հաջող կոմերցիա է լինում ու իրենք էլ հաջող աշխատավարձ են ստանում»,-նշեց մեր զրուցակիցը:

Սերիալը եթեր կգնա US Armenia TV-ով և Կենտրոն հեռուստաընկերությամբ: Նշենք, որ Կենտրոն հեռուստաընկերությունն արդեն իսկ նոր տնօրինություն ունի, որը նպատակ ունի այն դարձնել առաջադեմ TV՝ մի շարք հետաքրքիր պրոյեկտներով ու հեռուսադիտողի կողմից սպասված սերիալներով: Հեռուստաընկերության նորանշանակ տնօրենը «Բախտաբեր» սերիալի պրոդյուսեր Էդգար Ավագյանն է: 

Ի դեպ, սա այն քիչ հեռուստաընկերություններից էր, որն ավելի շատ միտված էր լրատվություն տարածելուն: Մեր զրուցակցից հետաքրքրվեցինք, թե արդյոք այսուհետ այդ հեռուստահաճախականության վրա ավելի շատ կհանդիպենք ժամանցային ծրագրերի: «Այո, գրեթե 70 տոկոս ֆորմատային փոփոխություն կլինի, այլ ծրագրային քաղաքականություն կունենա՝ սերիալներ, սիթքոմներ, ժամանցային հետաքրքիր հաղրդումներ: Դա այն է, ինչի պահանջարկն այսօր կա: Այդ են ապացուցում վարկանիշային բազում կազմակերպությունները: Սակայն դա չի նշանակում, որ հեռուստաընկերությունը չի ունենալու հանրակրթական, սոցիալական կամ մանկական հաղորդումներ: Ամեն ինչ լինելու է բալանսի մեջ»,-հավատացրեց նա:

Մարդիկ այս կամ այն երևույթից, նույնիսկ հեռուստավահանակի վրա նշված ալիքից կախվածություն ունեն: Չկա՞ մտավախություն, որ նոր սերիալը, թեկուզ այն լինի մինչ այս եղածների մեջ ամենահետաքրքիրը՝ հաջողություն չի ունենա զուտ հեռուստաընկերության փոփոխության պատճառով. «Հնարավոր է, իհարկե: Նման ռիսկ կա, բայց մենք պետք է դրան գնանք և քարը-քարին դնելով՝ բուրգ ստանանք: Իհարկե, ես գիտեմ, որ այսօրվա դրությամբ հեռուստադիտողների քանակով մենք «թոփ 1» հեռուստաընկերությունը չենք, սակայն մենք էլ ունենք մենք լսարանը: Այսօր շատ քչերը գիտեն, թե իրենց հեռուստավահանակի վրա նշված թվերից որի տակ որ ալիքն է: Մարդիկ անընդհատ ալիքնեը փոխում են, մինչև «գտնեն» այն հաղորդաշարը, որն իրենց կհետաքրքրի: Եթե մեզ մոտ գտնեն այդ «պրոդուկտը»՝ կմնան այդ ալիքի վրա: Այնպես որ, պետք է Կենտրոն հեռուստաընկերությունը «ողողենք» առավելագույն հետաքրքրաշարժ նախագծերով, որպեսզի մեր քմահաճ հեռուստադիտողին բավարարենք»:

Ռեժիսորը խոստացավ, որ բացի նոր հեռուստասերիալից՝ շուտով եթերում կլինեն մի շարք հետաքրքիր և բազմաբովանդակ ծրագրեր, որոնք արդեն իսկ մշակված են: