«Հոգնեցի մեդիաոլորտից». «Կարգին հաղորդման» Արամիկը՝ Արեգ Գալոյանը՝ 20-ամյակի, կոմպոզիտոր դառնալու և նպատակների մասին

ЛАЙФ 8 Февраль, 2021 16:34

Տարիներ առաջ «Կարգին հաղորդում» նախագծից լսարանին հայտնի Արամիկը, իրականում՝ Արեգ Գալոյանն արդեն 20 տարեկան է: Երեկ նա նշել է 20-ամյակը, ինչի առթիվ Tert.am Life–-ը նրա հետ զրույց է ունեցել։ Նա պատմել է օրը տոնելու իր տարբերակի, նվերների, կյանքի նոր փուլում գտնվելու, մեդիաոլորտից հոգնելու և կոմպոզիտոր դառնալու որոշման մասին:

«Ծննդյանս օրը մեծ շուքով նշել չեմ սիրում, ինձ դուր են գալիս փոքր, ընկերական հավաքույթները: Այս անգամ էլ բացառություն չէր, նշեցի երկու օր՝ ընկերներիս երկու տարբեր խմբերի հետ, շատերին վաղուց չէի տեսել: Ավանդական տորթը փոխարինել էի փոքր կեքսով, որի վրա դրեցի մոմը: Մի օրը մեր տանը նշեցինք, ընկերներս եկան, մեկը նվագեց, մյուսը երգեց, հաճելի օր ունեցանք»,- պատմեց նա:

Արեգի խոսքով՝ նվերներ տալ սիրում է, բայց հազվադեպ մարդկանց է ինչ-որ բան նվիրում, իր նվերները պետք է հետաքրքիր լինեն, որպեսզի ստացողին զարմացնեն:

«Ընկերներիցս մեկին ամռանը անգլիացի բնագետ Չարլզ Դարվինի լուսանկարն էի նվիրել: Անկեղծ ասած, նվերներ ստանալ ավելի շատ եմ սիրում, քան նվիրել: Որքան դրանք յուրահատուկ են, այնքան ավելի լավ: Այս տարի ընկերներիցս մեկն ինձ գիրք է նվիրել, որի անունն իր խնդրանքով ոչ ոքի չեմ ասում, այնքան էլ հայտնի գիրք չէ, չի ուզում, որ շատ մարդիկ իմանան այդ գրքի մասին, բայց կարող եմ ասել՝ հայ հեղինակ է: Մյուս ընկերս քաղցրավենիք է նվիրել, որի մեջ նաև մակարոն էր դրել: Նվերը բացատրություն ունի. նախորդ տարի նրա ծննդյան օրը համընկավ կորոնավիրուսի տարածման ակտիվ շրջանի հետ, երբ մարդիկ մեծ քանակությամբ գնումներ էին անում: Ես որոշեցի նրան մի քանի տուփ մակարոն նվիրել, նա էլ այս տարի վարձահատույց եղավ: Նաև մետր եմ նվեր ստացել, հետաքրքիր է, կյանքի տարբեր իրավիճակներում կարող է պետք գալ»,- ասաց նա:

Արեգը նկատեց, որ կյանքի նոր փուլում է, հրաժեշտ է տվել մեդիաոլորտին, նախորդ տարի ընդունվել է Երևանի պետական կոնսերվատորիա, անվճար է սովորում, ապագա կոմպոզիտոր է:

«Իմ մեջ ներքին փոփոխություններ եմ նկատում, յուրաքանչյուրն էլ ժամանակի հետ աճ է ապրում, բայց կարևոր է, որ հետո կարողանա իրեն նախկինում ու իրեն այսօր համեմատել, զգալ, որ հիմա ավելի լավն է: Ես մեդիաոլորտում աշխատել եմ 2 տարեկանից, 18-ից հետո անցել եմ թոշակի,– ժպիտով ասաց նա, ապա նկատեց, որ փոքրուց մեդիաոլորտում լինելը գուցե իրեն հոգնեցրել է: –20 տարում բավականին բովանդակալից կյանք եմ ապրել, տեսակով բարդություններ սիրող մարդ եմ, երբ դրանք չեն լինում, ձանձրանում եմ: Ինձ նորություն էր պետք, իսկ երաժշտության ոլորտում սովորելը, աշխատելը բարդ է, հիմա ինձ հանգիստ եմ զգում: Փոքրուց սիրել եմ երաժշտություն, կիթառ եմ նվագել, իսկ երբ 15 տարեկանում ունեցա իմ առաջին դաշնամուրը, հասկացա՝ մեդիաոլորտում իմ տեղը պետք է զիջեմ մի մարդու, ով ոլորտն ինձնից ավելի շատ կսիրի: Երկու տարի դաշնամուրի անհատական դասերի հաճախեցի և ընդունվեցի Կոնսերվատորիա: Այս ոլորտում ամեն ինչ քեզնից է կախված, համալսարան ընդունվելուց հետո սպասումներս արդարացան, որովհետև կուրսընկերներս շատ լավն են»:

Ըստ Արեգի՝ շատ նպատակներ ունի՝ ուզում է երաժշտություն գրել ֆիլմերի համար, նաև դասական ժանրում ստեղծագործել։ Նա նկատեց, որ իր նպատակները կատարվում են ժամանակի և աշխատանքի շնորհիվ:

«Սիրում եմ դեպի նպատակ տանող ճանապարհը, նպատակիս հասնելուց անմիջապես հետո մտածում եմ հաջորդ նպատակի մասին, չեմ հասցնում վայելել այդ պահը: Նպատակ ունեմ, որ Հայաստանում և աշխարհում դասական երաժշտությունը համապատասխան գնահատեն: Իդեալական, գեղեցիկ գործերը թողած՝ մարդիկ անհետաքրքիր երաժշտություն են լսում: Պատճառն այն է, որ այդ երաժշտությունը ստեղծվում է վաճառվելու համար, մարդիկ էլ աշխատանքից հոգնած տուն են գնում ու լսում թեթև երաժշտություն: Բարդ է աշխատանքից տուն գնալ ու ընթրիք պատրաստել, հեշտ է դրսում թեթև ինչ-որ բան ուտելը: Չեմ մեղադրում ոչ ոքի, բայց կուզեի Հայաստանում այդպես չլիներ: Պարտադիր չէ մարդիկ ժամանակակից կոմպոզիտորներին լսեն, կարող են լսել Արամ Խաչատրյանին, Առնո Բաբաջանյանին, Էդգար Հովհաննիսյանին: Խնդիրը ոչ թե կոմպոզիտորների, այլ մարդկանց մեջ է»,- եզրափակեց նա: