Վերջապես կինս տեսավ թե ինչու էր ամուսինն այսքան ժամանակ ուշ տուն գալիս. Վաչե Թովմասյան

Վերջերս ATV-ի եթերում մեկնարկած «Քարե դարդ» սիթքոմի դերակատարները ներկայանում են իրենց համար բացարձակ նոր ու դեռևս չտեսնված կերպարներում, բացի, իհարկե, Վաչե Թովմասյանից, որի հերոսը` Մոսոն, թերևս, շատերին ծանոթ թվա հումորիստի վիտամինյան ժամանակաշրջանից:

Vitamin club-ի Կլեպ-Գվեն-Մեսրոպիկ եռյակից վերջինը` անընդհատ «փող կպցնելու» ու պարտք փակելու խնդիրներով զբաղվող երիտասարդը, այժմ էլ (փոքր-ինչ հասունացած ու Մեսրոպիկից` Մոսո դարձած) հայտնվել է քարե դարում` ընկերոջ կիսակառույց ժամանակի մեքենայի շնորհիվ, ու տակնուվրա է անում նախնադարյան ցեղերից մեկի կյանքն ու բարքերը: Զրույցը Վաչե Թովմասյանի հետ սկսեցի նրա` իրեն և մեզ հարազատ դարձած կերպարից:

- Վաչե, էլ ինչ դարդ ունեք` բավական չէ, որ Ձեր հերոսի համար նոր խառնվածք մտածելու կարիք չկար, դեռ, ի տարբերություն սիթքոմի մյուս` քարեդարցի կերպարների, էս ցրտին նկարահանման տաղավարում կոշիկով եք...

- (Ծիծաղում է) Այո, կերպարս հեռուստադիտողին որոշ առումով ծանոթ է: Ճիշտն ասած` ի սկզբանե սիթքոմի սցենարային գաղափարին ծանոթանալով, մտածում էի, որ հերոսս գիտնական պետք է լինի, որը ժամանակի մեքենայի ստեղծման վրա է աշխատում: Բայց մի քանի դրվագ նկարահանելով` հասկացանք, որ ավելի ծիծաղելի կլինի, եթե քարե դարում դրանից խիստ տարբերվող խառնվածքի տեր մարդ հայտնվի: Այդպես եկանք Մեսրոպ-Մոսոյի կերպարին, որն արդեն հասցրել էր սիրվել հեռուստադիտողի կողմից: Իհարկե, ավելացրել ենք նոր գույներ ու բոլորովին նոր իրավիճակներ: Ինչ վերաբերում է էս ցուրտ եղանակին գործընկերներիս համեմատ շահեկան վիճակիս, ապա ասեմ, որ տաղավարը, որտեղ մենք նկարահանվում ենք, արդեն լավ տաքացվում է, այնպես որ հիմա էլ ես եմ շորերով շոգից նեղվում...

- Այս նախագծում Ձեզ, Արմուշին և, ինչպես պարզվեց, «Վիտամինի» երկու սցենարիստներին միավորելու գաղափարը Ձե՞զ է պատկանում:

- Ո՛չ ես այն ժամանակ պրոդյուսերական կազմում չէի: Բոլոր մասնակիցներին հեռուստաալիքի ղեկավարությունն ու մտահղացման հեղինակ Սարգիս Մնոյանն են ընտրել ու հաստատել: Ուրախ եմ, որ արդյունքում այսպես ստացվեց, քանի որ մեր սցենարիստ ընկերները` Վան Գրիգորյանն ու Գրիգոր Գևորգյանը, մեզ արդեն լավ ճանաչելով` ավելի հեշտ են սցենար գրում: Մենք էլ մեր իմպրովիզացիաներով ենք փորձում լրացնել այն:

 

- Այս սիթքոմն էլ է զուտ երիտասարդների համար նախատեսված:

- Կարծում եմ` մեզ ոչ պակաս հաճույքով կդիտեն նաև երեխաները, քանի որ «Քարե դարդում» շատ վառ ու գունեղ պատկեր ենք ստացել, այն համալրելով անիմացիոն հնարքներով: Օրինակ` դինոզավրերը, բնականաբար, համակարգչային անիմացիայի արդյունք են: Բայց դա չի նշանակում, թե միջին տարիքի մարդիկ ոչինչ չեն գտնի մեր սիթքոմում: Օրինակ` սցենարում կա սոցիալական և քաղաքական հումոր, որն առավել ընկալելի ու հետաքրքիր է նրանց համար:

- Ի սկզբանե որոշել էիք, թե կոնկրետ ո՞ր ժամանակաշրջանում է հայտնվելու Մոսոն:

- Այո, 201444 թվականում` մ.թ.ա: ...Հայտնվելով այնտեղ` հերոսս տեսնում է այդ տարեթիվն ու ասում` «Այ, ստեղ Մոսոն թքեց»...

- Երևի Դուք էլ նույն բանն ասացիք, երբ ամբողջապես ներգրավվեցիք անվերջանալի ու տաժանակիր նկարահանումների մեջ:

- Ի՞նչ արած` ինչպես Մոսոն կասեր` ընկել ենք, պիտի քաշենք: Արդեն որերորդ ամիսն է, ինչ ամբողջովին այս նախագծի մեջ եմ, քանի որ ոչ միայն գլխավոր դերում եմ նկարահանվում (ի դեպ, ամեն օր` առանց հանգստյան օրերի), այլև սկզբնական շրջանում մասնակցում էի սցենարական աշխատանքներին, հիմա էլ զբաղված եմ նախագծի պրոդյուսինգով: Մի խոսքով, աշխատում եմ հետևել սիթքոմի ստեղծման բոլոր փուլերին: Ճիշտ է, այս ամենը շատ ժամանակ է խլում, այնուամենայնիվ հաճույքով եմ անում:

- Արդյո՞ք Ձեր կինն էլ է կիսում Ձեր այս ոգևորությունը:

- ...Կինս (ի դեպ, վերջերս Վաչեն ու Գայանեն նշել են իրենց ամուսնության 2-ամյակը - հեղ.) եկել էր մեր նախագծի շնորհանդեսին: Վերջապես նա տեսավ (ծիծաղում է), թե ինչու էր ամուսինն այսքան ժամանակ ուշ տուն գալիս:

- Եվ ի՞նչ կարծիք հայտնեց:

- Ես միշտ նախընտրում եմ դիտողություններն ու քննադատությունը, հատկապես կնոջիցս, քանի որ... (ժպտում է), երբ ծանոթացանք, նա արդեն բավական շատ լավ ֆիլմեր դիտած, ճաշակ ձևավորած աղջիկ էր: Դե մասնագիտությամբ լրագրող է, նաև ռեժիսորական կուրսեր է ավարտել... Ու ծանոթանալով մեր նախնական աշխատանքին, ասաց` պետք է որ լավ լինի...

 

- Նա է՞լ է հեռուստատեսությունում աշխատում:

- Ո'չ, նա զբաղված է «Իմ Երևան» կայքում և քաղաքը բարելավելու նախաgծում, որը նպատակ ունի gեղեցկացնել Երևանը:

- Իսկ ինչպե՞ս է հանդուրժում ամուսնու` տանը քիչ լինելը:

- Հավանաբար ըմբռնումով է մոտենում ու դեռևս շատ չի բողոքում: Երևի նրանից է, որ նրա աշխատանքային գրաֆիկն էլ է բավական խիտ ու (ժպտում է) ժամանակ չունի իմ բացակայության առիթով նյարդայնանալու: Այդ առումով բախտս բերել է...

Աղբյուրը՝ TV Մոլ