Փոփոխություններ՝ վարորդական իրավունքի տեսական քննությունում․ նոր հարցեր են ներառվել

Վարորդական իրավունքի տեսական քննության հարցաշարերում ավելացել են նոր հարցեր՝ A, B, C խմբում 11, իսկ D, T խմբում՝ 437։ Դրանք թեստերում կարող են ներառվել հրապարակումից 30 օր հետո։ Քննությունը հանձնելու համար պետք է ճիշտ պատասխանել 20 հարցից առնվազն 18-ին, իսկ առաջին անգամ չհանձնելու դեպքում կրկին մասնակցելու համար պետք է սպասել 7 օր կամ վճարել 30 000–45 000 դրամ։

 

Ինչպես տեղեկացնում է Iravaban.net-ը, կանոնները սահմանված են կառավարության 2020 թ.-ի մարտի 26-ի N 385-Ն որոշմամբ (փոփոխված՝ 2026 թ.-ի հուլիսի 2-ի N 979-Ն որոշմամբ) և «Պետական տուրքի մասին» օրենքի 20-րդ հոդվածով։

 

Ինչպե՞ս է անցկացվում քննությունը

 

1. 2026 թ.-ի սեպտեմբերի 1-ից հարցաշարը տարբերակված է. A, B, C կարգերի համար՝ առանձին, D, T կարգերի համար՝ առանձին։
2. Ներքին գործերի նախարարությունը նոր հարցաշարերը հրապարակել է 2026 թ.-ի հոկտեմբերի 2-ին roadpolice.am կայքում։ Նոր հարցերը թեստերում կարող են ներառվել հրապարակումից 30 օր հետո։
3. Թեստը բաղկացած է 3 հոգեբանական և 20 գիտելիքի հարցից, որոնց պատասխանելու համար տրվում է 30 րոպե։ Գիտելիքի հարցերից 2-ը «Ճանապարհային երթևեկության անվտանգության ապահովման մասին» օրենքից են, 17-ը՝ ճանապարհային երթևեկության կանոններից և անսարքությունների ցանկից, 1-ը՝ առաջին օգնությունից։
4. Քննությունը համարվում է հանձնված, եթե ճիշտ եք պատասխանել գիտելիքի հարցերից առնվազն 18-ին։ Գիտելիքի հարցերին կարող եք պատասխանել միայն հոգեբանական թեստի բոլոր հարցերին ճիշտ պատասխանելու դեպքում։

 

Իսկ եթե չեք հանձնել

 

1. Կրկին մասնակցել կարող եք ոչ շուտ, քան 7 օր անց։ Երկրորդ անգամ չհանձնելու դեպքում յուրաքանչյուր հաջորդ քննությանը կարող եք մասնակցել ոչ շուտ, քան վերջին քննությունից մեկ ամիս անց։

 

1. Ավելի շուտ կարող եք մասնակցել արտահերթ քննության՝ պետական տուրք վճարելով.

 

• առաջին անգամ չհանձնելու դեպքում՝ հաջորդ աշխատանքային օրը՝ 45 000 դրամ, 3-րդ աշխատանքային օրը՝ 30 000 դրամ,
• երկրորդ և հաջորդ անգամ չհանձնելու դեպքում՝ 7-րդ աշխատանքային օրը՝ 45 000 դրամ, 14-րդ աշխատանքային օրը՝ 30 000 դրամ։

 

Նույն կանոնը գործում է նաև գործնական քննության դեպքում։

 

Որքա՞ն է գործում տեսական քննության արդյունքը

 

1. Տեսական քննությունը հանձնելուց հետո գործնական քննությունը պետք է հանձնել երկու տարվա ընթացքում։ Հակառակ դեպքում տեսական քննության արդյունքն ուժը կորցնում է, և այն պետք է կրկին հանձնել։

 

Ամփոփելով՝ տեսական քննությունում ներառվում են նոր հարցեր, հանձնելու համար անհրաժեշտ է 20-ից առնվազն 18 ճիշտ պատասխան, իսկ առաջին անգամ չհանձնելու դեպքում կարելի է սպասել 7 օր կամ վճարել արտահերթ քննության համար, – տեղեկացնում է կայքը։