ՍԴ դատավորի առաջադրման ժամկետն անցել է, իսկ թեկնածու դեռ չկա. «Փաստ»
ՔԱՂԱՔԱԿԱՆ«Փաստ» օրաթերթը գրում է.
Մայիսի 4–ին Ազգային ժողովի պատգամավորների ձայների 51 կողմ, 3 դեմ հարաբերակցությամբ Էմիլ Բաբայանը չընտրվեց Սահմանադրական դատարանի դատավոր։ Էմիլ Բաբայանն Արցախի նախագահի խորհրդականն է, նրա թեկնածությունն առաջադրել էր ՀՀ նախագահ Արմեն Սարգսյանը։ Ըստ «Ազգային ժողովի կանոնակարգ» սահմանադրական օրենքի 141–րդ հոդվածի 8– րդ կետի՝ եթե Սահմանադրական դատարանի դատավորը չի ընտրվում, ապա քվեարկությունից հետո` տասնօրյա ժամկետում, իրավասու մարմինը առաջադրում է նոր թեկնածու: Նշենք, որ երեկվա դրությամբ մայիսի 4–ի ընտրությունից ոչ թե 10, այլ 17 օր էր անցել, բայց ՀՀ նախագահ Արմեն Սարգսյանը դեռ Սահմանադրական դատարանի անդամի նոր թեկնածու չէր առաջադրել: Սահմանադրական դատարանի անդամի նոր թեկնածուի առաջադրման առումով նշված փաստը որոշակի հարցեր է առաջ բերում՝ հաշվի առնելով, որ «Ազգային ժողովի կանոնակարգ» սահմանադրական օրենքով հստակ սահմանված ժամկետ կա: Խնդրի շուրջ փորձեցինք պարզաբանում ստանալ նախագահ Արմեն Սարգսյանի օգնական Հասմիկ Պետրոսյանից: Վերջինս «Փաստ»–ի հետ զրույցում հայտնեց, որ մի քանի օր առաջ նախագահը ԱԺ նախագահ Արա Բաբլոյանին նամակ է հղել: Նա նամակից մի հատված ներկայացրեց, որն օրերս հրապարակվել էր նաև կայքերից մեկում. «Ելնելով Ազգային ժողովում նախորդ թեկնածուի ներկայացման ժամանակ հնչած առաջարկներից և քննադատությունից, ինչպես նաև այդ հարցով իմ ունեցած բազմաթիվ հանդիպումներից՝ եկել եմ այն եզրահանգման, որ թեկնածություն ներկայացնելիս անհրաժեշտ են հստակ խորհրդակցական մեխանիզմներ և ընթացակարգեր: Կարևորում եմ նաև հավուր պատշաճի քննարկումները իրավաբանական հանրության ներկայացուցիչների, ինչպես նաև շահագրգիռ այլ կողմերի հետ: Տեղեկացված եմ Սահմանադրական դատարանի դատավորի ընտրության ընթացակարգերի վերաբերյալ հասարակական կազմակերպությունների մտահոգություններին և առաջարկներին: Կարևորելով վերոշարադրյալը, ես պատրաստ եմ լսելու իրավաբանական հանրության ներկայացուցիչների կարծիքները՝ Սահմանադրական դատարանի բարձր դերին համապատասխանող դատավորի թեկնածությունների վերաբերյալ և Ազգային ժողովին առաջադրել Սահմանադրական դատարանի դատավորի թեկնածու: Որպես ՀՀ նախագահ, որի հիմնական առաքելությունը Սահմանադրության պահպանմանը հետևելն է, վստահեցնում եմ, որ կձեռնարկեմ անհրաժեշտ բոլոր քայլերը՝ ողջամիտ ժամկետներում այդ առաջադրումը կատարելու համար»: Հետաքրքրվեցինք՝ Ազգային ժողովից որևէ արձագանք եղե՞լ է: Ի պատասխան, Հասմիկ Պետրոսյանը նշեց, որ հստակ տեղյակ չէ և խորհուրդ տվեց ճշտել Ազգային ժողովից: Ազգային ժողովի հասարակայնության և տեղեկատվության միջոցների հետ կապերի վարչության պետ Արսեն Բաբայանը մեզ հետ զրույցում հստակեցրեց, որ նամակն աշխատանքային է. «ՀՀ նախագահը գրություն է ուղարկել ԱԺ նախագահին: Հիմա սրանք աշխատանքային հարաբերություններ են, աշխատանքային նամակագրություն է, ինչը ենթակա չէ մեկնաբանման»: Արսեն Բաբայանն ընդգծեց, որ ընտրու թյան օր չի կարող նշանակվել, եթե չկա թեկնածու, իսկ ընտրության ժամկետները հստակեցված են օրենսդրությամբ: Հարցին, թե այնուամենայնիվ, սահմանված ժամկետն անցել է, և դա արդյո՞ք չի նշանա կում, որ խախտվում է ԱԺ կանոնակարգը, Արսեն Բաբայանը նշեց. «Խախտում արձանագրողն ու չարձանագրողը Ազգային ժողովը չէ: Ես չգիտեմ, թե իրենք նամակի որ մասն են հայտնել, որ մասը՝ ոչ, բայց դրանք աշխատանքային փաստաթղթեր են: Ժամկետի խախտումները և մնացած այլ հանգամանքները ենթակա են Սահմանադրական դատարանի քննությանը, եթե որևէ մեկը ներկայացնի սահմանադրական վեճ: ՀՀ նախագահը աշխատանքային գրություն է ուղարկել ԱԺ նախագահին, դրանք աշխատանքային հարցեր են, չեն ենթադրում մեկնաբանություններ»: Հավելենք, որ Սահմանադրական դատարանի դատավորի նոր թեկնածուի ընտրության հարցի շուրջ հայտարարությամբ են հանդես եկել նաև փաստաբանական համայնքի 112 ներկայացուցիչներ ու մի շարք հ/կ–ներ: Նրանք շեշտել էին, որ «Սահմանադրությամբ նախագահին վերապահված՝ նոր թեկնածու առաջադրելու ժամկետային սահմանափակման նպատակը չի կարող գերակշռել Սահմանադրությամբ սահմանված Սահմանադրության պահպանության շահի նկատմամբ: Նախագահը չի կարող գերապատվություն տալ ԱԺ կանոնակարգ սահմանադրական օրենքով նախատեսված ԱԺ աշխատանքի կազմակերպման տեխնիկական պահանջներով՝ ի վնաս իր սահմանադրական հիմնական խնդրի լուծման»:
Շարունակությունը՝ «Փաստ» օրաթերթի այսօրվա համարում