«Իշխանությունները չկարողացան անգամ գտնել որևէ ընդդիմադիրի, ով մեքենայի հետևից կրակել է». «Փաստ»
ՀԱՐՑԱԶՐՈՒՅՑ«Փաստ» օրաթերթը գրում է.
Պաշտպանության նախկին փոխնախարար, «Մարտի 1»–ի գործով փաստահավաք խմբի նախկին անդամ Անդրանիկ Քոչարյանի կարծիքով, Հայաստանի համար ողբերգական այդ իրադարձությունից 10 տարի անց միայն նորից վերսկսվեց գործի բացահայտման քայլեր արվել, երբ երկրում իրավիճակ փոխվեց: Մինչ այդ, դեռևս ԱԺ պատգամավոր եղած ժամանակ Նիկոլ Փաշինյանը ԱԺ–ում «Մարտի 1»–ի գործով լսումներ էր կազմակերպել, ինչը նոր խթան հանդիսացավ, որ բանակի ներգրավման մասին կատարված 2010 թվականի զեկույցը կրկին շրջանառության մեջ մտնի:
Ու թեև մինչ այդ արդեն իսկ զեկույցը հրապարակված եղել է, սակայն հասկանալի պատճառներով այն «դուրս» է մնացել նախորդ իշխանությունների տեսադաշտից: Եվ այս տարի արդեն լսումների արդյունքում այն ընդունվել է որպես նոր ի հայտ եկած հանգամանք: Ա. Քոչարյանի տեղեկացմամբ, այդ ուսումնասիրությունն այնպիսի փաստացի նյութ է պարունակում, որի միջոցով բացահայտվում են ուժային բուրգի կողմից իրականացված ամբողջ ապօրինությունները:
«Ես միշտ էլ ասել եմ, որ այս զեկույցից և Միքայել Հարությունյանի հարցաքննությունից պարզ կդառնա, որ 2008 թվականին Հայաստանում տեղի է ունեցել ռազմական հեղաշրջում, սահմանադրական կարգի բռնագրավում: Այսինքն, իշխանության ուզուրպացիա՝ ուղեկցված բռնություններով, որի արդյունքում առնվազն 10 քաղաքացի մահացել, իսկ տասնյակ քաղաքացիներ ենթարկվել են բռնությունների, հետապնդման, նրանցից շատերը դարձել են քաղբանտարկյալներ»,– հարցազրույցներից մեկում նշում է Ա. Քոչարյանը:
Նրա դիտարկմամբ, եթե Մ. Հարությունյանը և ՀՀ երկրորդ նախագահ Ռ. Քոչարյանը չներկայանան նախաքննական մարմին, ապա կդառնան սովորական հանցագործ: Բացի այդ, Ա.Քոչարյանի կարծիքով, այս գործի բացահայտումը միայն կմաքրի ավգյան ախոռները:
«Փաստ» օրաթերթը փորձեց Ա. Քոչարյանից տեղեկանալ, որ հիմա, երբ արդեն պարզ է, որ Ռ. Քոչարյանը ներկայացել է քննությունը վարող մարմին, ավելին՝ նա գործով ներգրավվել է որպես մեղադրյալ, արդեն կարելի՞ է համարել, որ ՀՀ երկրորդ նախագահն այլևս սովորական մեղադրյալ չի համարվում:
«Այս պահի դրությամբ Ռ. Քոչարյանն արդեն եկել, ներկայացել է և իրեն արդեն մեղադրանք է ներկայացվել, իսկ Միքայել Հարությունյանը եթե չգա, ապա ես կմնամ նույն կարծիքին, որ նա կմնա որպես սովորական հանցագործ: Եվ նա ճիշտ կանի գա, քանի որ դա բխում է նրա անձնական շահերից, քանի որ դատարանում պետք է իրեն ուղղված մեղադրանքներին փորձի պատասխանել»,– ասաց Ա. Քոչարյանը:
Նրա դիտարկմամբ, Քոչարյանը ավելի մեծ հանցագործ է, որն ապացուցված է թե՛ «Մարտի 1»–ի զեկույցում և թե՛ այլ տեղեկություններով: Եվ այս պահի դրությամբ նա շատ ավելի ծանր հանցագործության մեջ է մեղադրվում: Եվ եթե չգար, ապա կդառնար սովորական հանցագործ:
Հարցին, թե ո՞վ է ժամանակին կասեցրել փաստահավաք խմբի աշխատանքը, Ա. Քոչարյանը պատասխանեց, որ Սերժ Սարգսյանը հրամանագիր ստորագրեց, որով լուծարեց հանձնաժողովը: Հաստատելով իր տեսակետը, թե «Մարտի 1»–ի բացահայտումը կմաքրի ավգյան ախոռները, Ա. Քոչարյանն ասաց.
««Մարտի 1–ի» բացահայտումը միայն Ռոբերտ Քոչարյանին և Միքայել Հարությունյանին չի վերաբերում: Սա ամբողջ պետական համակարգի մասին է, որի գործողություններն ուղղվել են մեր պետության և մեր ժողովրդի դեմ: Եվ եթե ընդդիմությունն այստեղ մեղքի բաժին ունի, ապա իշխանություններն ունեին մեղադրանք ներկայացնելու հսկայական ժամանակ: Առավել ևս, երբ ընդդիմության բազմաթիվ ներկայացուցիչներ որպես քաղբանտարկյալներ գտնվում էին մեկուսարաններում: Իշխանությունները չկարողացան անգամ գտնել որևէ ընդդիմադիրի, ով մեքենայի հետևից կրակել է: Նրանք դրա համար ունեին 10 տարուց ավելի ժամանակ, բայց չգտան, որովհետև դա գոյություն չունի»,– ասաց Ա. Քոչարյանը:
Շարունակությունը՝ «Փաստ» օրաթերթի այսօրվա համարում