«Անթույլատրելիության սահմաններն ավելի քան անցած են. հիմքում դատական համակարգը ծնկի բերելու նպատակն է»
ՀԱՐՑԱԶՐՈՒՅՑ«Փաստ» թերթը գրում է․
Ամիսներ առաջ մեկնարկած ու այսօր էլ շարունակվող որոշակի գործողությունների հիմքում փաստաբան Լուսինե Սահակյանը երկու հիմնախնդիր է առանձնացնում։
«Հաշվի առնելով իրականացվող հետապնդումները, ակնհայտ է, որ գործադիր իշխանությունը պայքարում է դատական իշխանության դեմ։ Այդ առումով որոշակի դերակատարում ունի նաև օրենսդիրը։ Նպատակը դատական իշխանությանն ամեն կերպ կոտրելն է, որ բոլոր դատավորներն անվերապահ ենթարկվեն գործադիր իշխանությանը։ Թեպետ միշտ ասել ենք, որ դատարաններն անկախ չեն, բայց գոնե եղել են անկախ դատավորներ։ Տեսնելով դա՝ գործադիր իշխանությունը արդեն բավականին երկար ժամանակ է, ինչ պայքարում է այդ դատավորների դեմ։
Եվ այդ ճանապարհին թիրախավորվեց նաև Սահմանադրական դատարանը։
Ըստ իս՝ առաջին անգամ է, որ մենք անկախ ՍԴ ունենք, որը որևէ կերպ չի ցանկանում կատարել գործադիրի կամքը։
Սկզբնական շրջանում ուղղակի հորդորելով, իսկ հետագայում արդեն դատարանների դռները փակելով, քրեական հետապնդումներով և անգամ օրենսդրական նախաձեռնությամբ փորձեցին ձերբազատվել ՍԴ այն դատավորներից, որոնք չեն ցանկանում կատարել իրենց կամքը։
Այդուհանդերձ, թե՛ ՍԴ, թե՛ մյուս դատավորները, որոնց դեմ ուղղակի պայքար էր տարվում, իրենց բարձրության վրա են»,-«Փաստի» հետ զրույցում ասաց Լ. Սահակյանը՝ նշելով, որ նրանք միահամուռ կերպով ապացուցեցին, որ գործադիրը չի կարող ճնշել իրենց։
Նրա խոսքով, այս օրինակը տարածվեց նաև մի շարք այլ դատավորների գործելաոճի վրա. «Այն դատավորները, որոնց հետ փաստաբանները հույսեր չէին կապում, անգամ նրանք անկախացան, և այսօր իրավամբ անկախ դատավորի կողմից իրականացված օրինական դատական ակտեր են կայացվում։
Զուգահեռ՝ հիմնական մասը շատ ավելի լուրջ կամակատար դարձավ, քան նախկինում էր»։ Անդրադառնալով մասնավորապես ՍԴ-ի շուրջ ծավալվող գործողություններին՝ փաստաբանը շեշտեց.
«Հարցը հասավ նրան, որ ապօրինի քրեական հետապնդումներ եղան, ականատես եղանք անգամ խուզարկության։ Առնվազն իրավաբանի համար նման իրավիճակը ծիծաղելի է, եթե չասենք, որ իրականում «լացելու» է։ Պետության համար շատ լուրջ խնդիր է, երբ ՍԴ նախագահի տունը կարող է խուզարկվել, իսկ խուզարկության նպատակը հերթական անգամ ցույց տալն է, որ նա պետք է հեռանա»։
Երկրորդ հիմնախնդիրը, ըստ փաստաբանի, հասարակության հետ է կապված։
«Հասարակության շատ մեծ շերտեր տարօրինակ վարքագիծ են դրսևորում։ Կան իրողություններ, որոնց համար իշխանությունները պետք է քննադատվեն, բայց այդ շերտերը ծափահարում են նրանց։ Կան մարդիկ, որոնք կարծիք արտահայտելու իրավունք չունեին, որովհետև իրենց կարծիքը որևէ կերպ հիմնավորված չէր կարող լինել, բայց իշխանափոխությունից հետո ստեղծվեց մի իրավիճակ, ըստ որի՝ այդ շերտը բարձրացավ ու հիմա որոշիչ դերակատարում ունի։
Հասարակության մի ստվար զանգված կարծում է, որ իր կարծիքը վճռորոշ է ու անգամ շատ կարևոր։ Շատ լավ է, որ հասարակությունը փորձում է ներգրավված լինել այս ամենին, բայց խնդիրն այն է, որ չքննադատողների բանակը չի էլ ուզում մտածել, չի էլ փորձում հասկանալ, թե խոսքն ինչի մասին է և միայն մտածելով կարծիք հայտնել։ Եթե մտածելով կարծիք հայտնեն, այն ճիշտ հակառակը կլինի։
Այս իրավիճակն է, որը հիմա ագրեսիվ մթնոլորտ է ստեղծել։ Այս մթնոլորտն իր հերթին ստեղծում է մի վիճակ, որտեղ իշխանություններն արդեն անցնում են «բեսպրեդելի»։ Այս պատկերը պետության համար լուրջ խնդիր է։
Այս ամենից զատ՝ նաև տեսնում ենք, որ հարձակումներն արդեն ոչ միայն դատավորների նկատմամբ են, այլ լրատվամիջոցների, ինչպես նաև փաստաբանների։ Հարցը հասել է նրան, որ արդեն փաստաբաններ են հետապնդվում։
Ավելին՝ պետական մարմիններն են հետապնդում իրականացնում։ Օրինակ՝ փաստաբանի գրասենյակում խուզարկություն կատարելու թույլտվություն տրվեց, ինչն անթույլատրելի էր և արգելված օրենքով։
Նախօրեին էլ տեսանք, որ կոտրվել է փաստաբաններից մեկի էլեկտրոնային փոստի հասցեն։ Մուտք էին գործել փաստաբանի էլեկտրոնային հասցե ու ֆեյսբուքյան էջ մուտք գործելու փորձ արել։
Մեծ հաշվով, անթույլատրելիության սահմաններն ավելի քան անցած են։ Իշխանությունները, վերջին հաշվով, պետք է հասկանան, որ գոնե մի պահ պետք է կանգ առնել։
Անթույլատրելի արտահայտություններից, ահաբեկումներից անցում է կատարվել քրեական հետապնդումների, որոնք խայտառակ ապօրինի են։ Այդ ապօրինի հետապնդումների հիմքում դատական համակարգը ծնկի բերելու նպատակն է»,-եզրափակեց փաստաբանը։
Մանրամասները՝ «Փաստ» թերթի այսօրվա համարում։