Պատերազմից Ադրբեջանը դուրս է գալու իմիջային առումով ԻՊ-ի հետ նույնականացված. Արցախի նախագահի խորհրդական
ՔԱՂԱՔԱԿԱՆՄիջազգային հանրությունը արդեն իսկ Ադրբեջանը նույնականացրել է Իսլամական պետության հետ։ Այս մասին NEWS.am-ի հետ զրույցում ասել է Արցախի Հանրապետության նախագահի միջազգային հարաբերությունների հարցերով խորհրդական Նելլի Բաղդասարյանը։
ԱՀ նախագահի խոհրդականի հետ NEWS.am-ը զրուցել է Արցախի դեմ Ադրբեջանի սանձազերծած պատերազմում զինյալ գրոհայինների ներգրավման, տարածաշրջան բերված խմբավորումների վերաբերյալ տվյալների, այդ ամենին միջազգային արձագանքի մասին։
Ադրբեջանի համար ի՞նչ խնդիր կարող է ստեղծել զինյալ ահաբեկչական վարձկանների օգտագործման փաստը.
- Սեպտեմբերի 27-ին Ադրբեջանի սանձազերծած պատերազմն ունի մի շարք առանձնահատկություններ, մասնավորապես դրանցից է այն, որ բացի նյութական և մարդկային հսկայական կորուստներից, սպառված զինանոցից, Ադրբեջանը պատերազմից դուրս է գալու իմիջային առումով նույնականացված Իսլամական պետության հետ: Ադրբեջանն ապարդյուն և ուշացած ջանքեր է գործադրում այս փաստը ժխտելու համար: Մասնավորապես՝ հոկտեմբերի 15-ին Ի. Ալիևը France 24-ին տված հարցազրույցում ժխտել է վարձկանների օգտագործման փաստը:
Կան արդյո՞ք կոնկրետ տվյալներ ահաբեկչական խմբավորումների մասին:
- Մեր ունեցած տվյալներով, որոնց ցուցակը շարունակում է համալրվել Մերձավոր Արևելքից տեղափոխված Արցախի Հանրապետության դեմ կռվող հիմնական վարձկան զինյալ ահաբեկչական խմբավորումներն են՝ «Սուլթան Մուրադ», «Ալ-Համզա», «Սուլեյման Շահ», «Լիուա ալ-Ֆարուկ», «Աբու Զեյդ», ինչպես նաև ՌԴ-ում արգելված «Ջեբհաթ ան Նուսրան», «Ֆիրքաթ Ալ-Համզան»: Հատկանշական է, որ կան նաև վարձկանների զանգվածային դժգոհության և վերադառնալու լուրջ պահանջների տվյալներ, որի պատճառ են հանդիսացել խոստացված բարձր աշխատավարձերը չվճարելը, ինչպես նաև իրենց զինակիցների զանգվածային վերացման փաստերը: Այս տրամադրությունները լուրջ հիմքեր են ենթադրելու, որ վարձկանները շուտով իրենց զենքը կուղղեն հենց ադրբեջանցի զինվորների դեմ:
Միջազգային հանրությունն արդյո՞ք բավարար և նպատակային է արձագանքել այս հարցին:
- Ադրբեջանի կողմից օգտագործվող զինյալ վարձկան ահաբեկչական խմբավորումների մասին ահազանգել են ԱՀ-ն և ՀՀ-ն, մասնավորապես Արցախի Հանրապետությունը հակաահաբեկչական կոալիցիա ստեղծելու կոչով դիմել է միջազգային հանրությանը, իսկ հոկտեմբերի 14-ին ՀՀ կառավարությունը հավանություն է տվել վարձկանների հավաքագրման դեմ միջազգային կոնվենցիան վավերացնելու մասին նախագծին: Ահաբեկչական խմբավորումների օգտագործման փաստը բարձրաձայնել են նաև Սիրիան և ԱՄՆ-ը: Ամենաբարձր մակարդակով այս փաստերի մասին բարձրաձայնել են ՌԴ-ն և Ֆրանսիան, որոնց տարբեր մակարդակներով արած հայտարարությունները չեն կարող անհետևանք մնալ և միջազգային հանրությունը արդեն իսկ դիտարկում է Ադրբեջանը որպես միջազգային ահաբեկչությունը հովանավորող, ֆինանսավորող և օգտագործող պետություն:
Ադրբեջանի որպես ահաբեկչական պետության փաստը հատկապես անհանգստացնում Ադրբեջանին սահմանակցող պետություններին, հետևաբար միջազգային ահաբեկչության դեմ պայքարի ձևաչափում պետք է սպասել կոնկրետ զարգացումների՝ ՌԴ-ից և Իրանից: Ընդ որում պետք է ենթադրել, որ Իրանն այս հարցում կարող է ակտիվորեն ներգրավվել հոկտեմբերի 18-ից նրա նկատմամբ զենքի էմբարգոյի վերացումից հետո:
Թուրքիայի միջոցով Մերձավոր Արևելքից Ադրբեջանի համար վարձկանների հավաքագրման և Ադրբեջան տեղափոխման փաստի մասին տեղեկություններ են հաղորդել միջազգային այնպիսի հեղինակավոր պարբերականներ, ինչպիսիք են INDEPENDENT, CNN, WSJ,THE Washington Post, ALJAZEERA, REUTERS, FP, The Moscow Times, France 24, The Arab Weekly և այլ հեղինակավոր լրատվամիջոցներ:
Փաստորեն, միջազգային հանրության արձագանքը տեսական մակարդակում միանգամայն բավարար է, ԱՀ-ն ակնկալում է տեսականից անցում գործնական քայլերի: