Գագիկ Սուրենյանը՝ հանրապետությունում և անձնական կյանքում տիրող «ջերմաստիճանի» մասին

Ինչ-ինչ, բայց եղանակի տեսության հաղորդման ժամանակ հեռուստաալիքը ոչ-ոք չի փոխում: Անձրև, թե արև՝ հետաքրքրում է բոլորին, հատկապես, երբ տեղեկացնողը հավաստի տվյալներով, ժպտադեմ Գագիկ Սուրենյանն է՝ ՏԿԱԻՆ հիդրոմետ ծառայության օդերևութաբանության կենտրոնի պետի տեղակալը: Aysor.am-ը հյուրընկալել է վերջինիս՝ զրուցելով ոչ միայն հանրապետությունում, այլև՝ նրա կյանքում տիրող «եղանակային պայմաններից»:

-Պարոն Սուրենյան, քանի որ արդեն մոտենում ենք տարեսկզբին՝ հետաքրքիր է, ինչպիսի՞ն կլինի 2016 թվականի ձմեռը Հայաստանում:

-Ինչպես և կանխատեսված է, 2016-ի հունվար և փետրվար ամիսներին օդի ջերմաստիճանը նորմայից բարձր է լինելու 1-2 աստիճանով, այսինքն՝ սպասվում է միջինից տաք ձմեռ: Սակայն դա չի նշանակում, որ ողջ ձմռան ընթացքում գարնանային եղանակ է լինելու՝ ինչպես այսօր: Ձմեռն առանձին օրերին կհիշեցնի, որ ձմեռ է. կլինեն և՛ օդի ջերմաստիճանի անկումներ, և՛ ձյուն:

-Ի դեպ, դեկտեմբերի 31-ը ձյունառատ կլինի՞:

-Քանի որ մեր ստույգ կանխատեսումները 5 օրվա վաղօրոքությամբ են, ստույգ չեմ կարող ասել՝ Ամանօրին ձյուն կլինի՞, թե ոչ:

-Առհասարակ, 2016 թվականի համար, թեկուզև ընդհանուր կանխատեսումներ արդեն իսկ կարելի՞ է անել:

-Ճիշտն ասած՝ 2016թ-ի կանխատեսումներն արված են միայն ձմռան համար, իսկ գարունը կներկայացվի փետրվարի վերջին, սպասվող ամառը՝ մայիսի վերջին:

-Ձմռան եղանակին ջերմաստիճանի բարձրացումը շատերին վախեցնում է, քանի որ այն կապում են հնարավոր սպասվող աղետների հետ: Տեղի՞ն է նման մտավախությունը:

-Ո՛չ, տեղին չէ, քանի որ մթնոլորտը միշտ գտնվում է շարժի մեջ, գոյություն ունեն օդային հոսանքներ և պայմանավորված, թե ինչ օդային հոսանք է ներթափանցում մեր երկիր, ջերմաստիճանը կարող է բարձրանալ կամ իջնել:

-Դուք այն մասնագետներից եք, ում խոսքին հեռուստադիտողը անվերապահորեն հավատում է: Ի՞նչ եք կարծում, դրան ավելի շատ Ձեր հայտնիությո՞ւնն է նպաստում…

-(Ժպտում է) հայտնիությունը այստեղ կապ չունի, դա կապված է ՏԿԱԻՆ հիդրոմետ ծառայության օպերատիվ և ճիշտ աշխատանքի հետ, մենք աշխատում ենք առաջինը մեր ժողովրդի համար, փորձում ենք ազգաբնակչությանը ապահովել ստույգ ինֆորմացիայով:

-Պարոն Սուրենյան, վերջերս Ձեզ հանդիպում ենք նաև «Շանթ» հեռուստաընկերությունում՝ եղանակի տեսության մեկնաբանի կարգավիճակում: Դա Ձե՞ր ցանկությունն էր, թե՞ պարզապես համաձայնեցիք առաջարկին:

-Դա եղել է իմ ցանկությամբ. հիմնական նպատակն այն է, որ ազգաբնակչությունը ինֆորմացիան լսի մասնագետից, այլ ոչ թե ոլորտի հետ ընդանրապես կապ չունեցող երգիչ-երգչուհիներից, դերասաններից, ինչին մենք հաճախ ականատես ենք լինում:

-Եթե չեմ սխալվում, հանդես եք գալիս նաև որպես «Օֆելյա» ֆիլմի պրոդյուսեր:

-Այո:

-Ինչպե՞ս ծնվեց նման որոշման գաղափարը, մի փոքր կմանրամասնե՞ք:

-Օֆելյա Համբարձումյանն իմ մտերիմ ընկերն է, իմ ամենասիրած երգչուհին, և ընդհանարպես, մեր բոլոր ժամանակների ժողովրդական և գուսանական երգերի ամենաքնարական կատարողը, հայ երգի թագուհին: Ընկերս ռեժիսոր է և նույնպես երգչուհու մեծ երկրպագուն: Ես նրան ծանոթացրել եմ երգչուհու հետ, երգչուհին վստահել է ռեժիսորին և ֆիլմը նկարահանվել է (ժպտում է):

-Ինչպե՞ս իր մասին ֆիլմն ընդունեց երգչուհին, կիսվե՞լ է Ձեզ հետ իր տպավորություններով:

-Ընդունեց մեծ հուզմունքով և երախտապարտությամբ: Հուզված էին բոլորը, որովհետև այդ ֆիլմը արտացոլում է նրա ողջ կյանքը:

-«Օֆելյա»-ն արդեն մեծ էկրան բարձրացել է, իսկ ե՞րբ հեռուստադիտողը հնարավորություն կունենա ֆիլմը տեսնել էկրաններին:

-Շատ շուտով:

-Լսել եմ, որ երիատասրդ շատ աղջիկներ եղանակի տեսությանը հետևում են հատուկ Ձեր պատճառով ու հենց նրանց հավանաբար կհետաքրքրի՝ ի՞նչ եղանակ է Գագիկ Սուրենյանի կյանքում:

-(Ժպտում է) ինչպես մթնոլորտում, այնպես էլ իմ կյանքում, եղանակները տարբեր են. դա կախված է օրվա իրադրությունից:

-Մարդիկ սիրում են որոշակի տեղեկություններ իմանալ այն մարդու մասին, ում ճանաչում են՝ թեկուզև էկրանից: Կպատմե՞ք մեզ Ձեր ընտանիքի մասին:

-Ամուսնացած եմ, ունեմ երկու հրաշք դուստր, ովքեր իմ ամենօրյա հոգևոր սնունդն են և հոգու ջերմությունը:

-Ձեր բնագավառի՞ց է Ձեր կինը:

- Կինս և՛ բակալավրիատը, և՛ մագիստատուրան սովորել է ինձ հետ: Միասին էլ աշխատում ենք արդեն 10 տարի:

-Ի՞նչ տարիքի են Ձեր փոքրիկները:

- Հինգ և երեք տարեկան են:

-Ի՞նչ նախասիրություններ, հետաքրքրություններ ունեք:

-Իմ տարերքը բնությունն է, ավելի կոնկրետ՝ լեռները: Ես պաշտում եմ լեռները, եթե գոնե 1 օր ազատ ժամանակ եմ ունենում,  լեռներում եմ՝ լինի դա ամառ, թե ձմեռ: Իսկ ամռանն օրերով իմ վրանով ապրում եմ լեռներում: Պատկերացնո՞ւմ եք, նույնիսկ դրախտն եմ տեսել. Գեղամա լեռների մարգագետնային մասը, Ակնա լիճը՝ 3030 մետր բարձրության վրա: Ես այնտեղ հաճախ եմ լինում, ամռանը 7 օրով մնում եմ:

- Ընտանիքի անդամները չե՞ն դժգոհում Ձեր հաճախակի բացակայությունից:

- Դժգոհում են, սակայն համակերպվել են (ժպտում է): Հասկանում են, որ ես առանց լեռների ու բնության ապրել չեմ կարող:

-Խստապահա՞նջ եք երկրորդ կես ընտրելու հարցում: Ինչպիսի՞ն է նա:

-Դե, ինչպես ասացի՝ երկրորդ կեսիս արդեն ընտրել եմ: Նա բնական է, պարզ և համեստ, որը, ըստ իս, մարդկային ամենաբարձր գնահատականն է:

-Խանդո՞տ եք բնավորությամբ:

-Ո՛չ:

-Ավանդապա՞հ եք:

-Ո՛չ:

- Ծնունդով Երևանի՞ց եք:

- Այո, Երևանից եմ, բայց մանուկ ժամանակ հաճախ եմ եղել գյուղում և հիմա էլ լինում եմ: Մայրս Կոշ գյուղից է:

-Եթե չեմ սխալվում, նաև դասավանդում եք ԵՊՀ-ում:

-Այո, 2012թ-ին ԵՊՀ-ի Աշխարհագրության և երկրաբանության ֆակուլտետի կողմից ստացել եմ դասախոսություններ կարդալու առաջարկ, սիրով ընդունել եմ և մինչև օրս դասախոսում եմ ջրաօդերևութաբանության ամբիոնում, որտեղ ես սովորել և պաշտպանել եմ իմ թեկնածուական ատենախոսությունը:

-Հետաքրքիր է, սերը Ձեր մասնագիտության նկատմամբ որտեղի՞ց է առաջացել: Գուցե ընտանիքի՞ց:

-Ոչ, մեր ընտանիքի, բարեկամների մեջ ընդհանրապես իմ մասնագիտության հետ կապ ունեցող մարդ չկա: Մասնագիտությանս նկատմամբ սերը եղել է բնատուր, ես հիշում եմ, փոքր ժամանակ, երբ ամպորպ էր լինում, հետևում էի ամպրոպի ամբողջ պրոցեսին ու անդադար մտածում՝ ինչի՞ց է լինում կայծակը: Երբ 6-րդ դասարանում էի, աշխարհագրության ուսուցչուհուս խնդրեցի, որպեսզի ինձ համար գտնի օդերևութաբանության գիրք: Ու նա գտավ այդ գիրքը: Իսկ այ 8-րդ դասարանում ես գտա Հայպետհիդրոմետը, եկա և խնդրեցի, որ ինձ սովորեցնեն, թե ինչպես է կանխատեսվում եղանակը (ժպտում է): Ինձ ընդունեցին, ու այդ օրվանից ես ամեն շաբաթ Հայպետհիդրոմետ էի գալիս, մինչև ընդունվեցի ԵՊՀ աշխարհագրության ֆակուլտետի օդերևութաբանության բաժինը: Արդեն 1-ին կուսից ինձ հրավիրեցին աշխատանքի:

-Էկրաններից միշտ ժպտերես ու բարձր տրամադրությամբ մարդու տպավորություն եք թողնում, բայց կյանքում խստապահանջ եք երևում:

-Կյանքում ոչ միշտ եմ ժպտերես, երբեմն ագրեսիվ եմ, շուտ բռնկվում եմ (ժպտում է):

-Եվ ի՞նչն է առավել շատ նպաստում նման իրավիճակներին:

-Մարդկանց անպատասխանատվությունը, սուտը, ինքնասիրահարված լինելը:

-Ընկերասե՞ր եք:

-Ընկերասեր եմ և հաճախ լսում եմ Ջիվանու «Ընկեր» երգը: Ինչպես ասում է մեծն Ջիվանին, «Բարի, գեղեցիկ, հավատարիմ ընկերը մարդու, փայլեցնում է արևի պես պատկերը մարդու»:

-Եվ ո՞վ է Ձեր ամենամտերիմ ընկերը:

-Հայկ Վարդանյանը՝ «Օֆելյա» ֆիլմի ռեժիսորը:

-Շուտով Ամանորն է, ինչպե՞ս եք պատրաստվում այն անցկացնել:

-Հունվարի 1-ը կանցկացնեմ ընտանիքիս հետ՝ տանը, իսկ հունվարի 2-ից որոշել եմ գնալ լեռներ: Առավել հստակ՝ Արագած լեռ, մի քանի օր կմնամ: Ինչպես նշեցի, ես լեռներից հսկայական դրական էներգիա եմ ստանում, որն ինձ օգնում է ապրել և աշխատել:

-Պարոն Սուրենյան, Ձեր ջերմ շնորհավորանքներից, կարծում եմ, մեր ընթերցողը չի հրաժարվի:

-Մաղթում եմ, որ անկախ դրսում տիրող եղանակից, բոլորի հոգիները լցված լինեն արևի անսպառ լույսով ու ջերմությամբ: Թող բոլորը ներողամիտ լինեն միմյանց նկատմամբ: