Ինչպես են հագնվում հայ դիզայներները. լուսանկարներ

Wnews.am-ը գրում է.

Հետաքրքիր է` ինչպես են հագնվում նրանք, ովքեր հագցնում են մյուսներին: Այստե՞ղ էլ է ակտուալ հայտնի ժողովրդական ասացվածքը. «Կոշկակարն առանց կոշիկի», թե՞ այնուամենայնիվ դիզայներներն իրենց համար ժամանակ գտնում են:

Արևիկ Սիմոնյան

Տարիներ  առաջ, երբ Արևիկը նոր էր հայտնվել հայկական նորաձևության աշխարհում, առաջին  բանը, որ հիշում էինք նրա կերպարի մասին խոսելիս՝ շնիկն էր, իսկ  նրա ստուդիայի պատն այդ ժամանակ դրսից զարդարված էր թիթեռներով:

Շնիկ, թիթեռներ, շեկ վարսեր, թվում էր՝ ամեն ինչ պարզ է, բայց, տարիների ընթացքում, Արևիկի ոճը փոխվեց, հիմա նա զուսպ, էլեգանտ տեսք ունի, բացի այդ, ինչը մեզ շատ է դուր գալիս, Արևիկը շեշտը դնում է իր աշխատանքի, այլ ոչ իր կերպարի վրա։ Նա այնքան էլ ակտիվ չէ համացանցում, իսկ այն, ինչ կա նրա ֆեյսբուքյան էջում, հիմնականում վերաբերում է իր աշխատանքին: Նա անընդհատ չի նկարում իր լուքերը, սելֆիներ չի անում, ավելորդ ուշադրություն իր վրա չի սևեռում, իր փոխարեն բավական ակտիվ է Kivera Naynomis էջը, որտեղ Արևիկի ապրանքանիշի աշխատանքներն են:

          

 

Անահաիտ Սիմոնյան

Նա, թերեւս, Արևիկի հակապատկերն է: Անահիտը շատ ակտիվ է համացանցում. սելֆիներ, սեփական լուքեր, հանգստից լուսանկարներ: Այս ամենի հետ՝ Անահիտն անձամբ է կրում և էլի լուսանկարների տեսքով համացանցում ցուցադրում իր նորաձեւության սրահի հագուստները: Անահիտի  դեպքում շեշտը դրված է իր կերպարի վրա: ԲԱՅՑ, ամեն ինչ այնքան էլ վատ չէ: Իրականում մենք ուզում ենք նշել, որ Անահիտը կարողացավ հասնել նրան, որ իրեն ընդունեն  որպես դիզայներ, որովհետև սկզբում շատերը թերահավատությամբ էին մոտենում նրա աշխատանքին։ Կարճ ժամանակում նա կարողացավ առաջընթաց գրանցել և հիմա շոու-բիզնեսի բավականին մեծ թվով հայտնիներ աշխատում են հենց Անահիտի հետ:  Ոճի առումով, ոչինչ չենք ուզում ասել, նկարները տեսնում եք  ինքներդ։

     

 

Ֆաինա

 Ֆաինան այն եզակիներից է, ով ունի իր ոճը: Դուր է գալիս այն մարդկանց, թե ոչ, այլ  հարց է ու Ֆաինային այնքան էլ հետաքրքիր չէ. նա իր ոճում իրեն լավ է զգում և շատ բնական տեսք ունի: Գուցե երբեմն ուզում ենք նրան տեսնել մի փոքր այլ կերպարում՝ ավելի կանացի, բարձրակրունկ կոշիկներով, երեկոյան զգեստներով, բայց այն, որ Ֆաինայի ոճը հետաքրքիր է, չենք կարող չնշել: Ճիշտ է, հայկական իրականության համար գուցե անսովոր է, երբ քավորակինը սանիկների մկրտությանը եկեղեցի է գնում կեդերով, բայց դա էլ հենց մեզ դուր է գալիս Ֆաինայի կերպարում:

    

Դիանա Շատվերյան

Դիանան ստեղծել է տիկնիկային, աղջկական կերպար, բայց այնքան շատ են մեր շոու-բիզնեսում տիկնիկային կերպարները, որ դիզայներից սպասում ես բոլորովին այլ բան: Ընդհանրապես, դիզայներներից սպասում ես բնավորություն, կրեատիվություն, նա պետք է շատ քաղցր-մաղցր  չլինի: Ամեն դեպքում. Դիանայի հագուստները դուր են գալիս շատ հայուհիների հենց իրենց աղջկական ու վառ լինելու շնորհիվ:

Ի դեպ, նա էլ Անահիտ Սիմոնյանի պես,  անձամբ է ներկայացնում իր դիզայներական հագուստները: