Հնա­րա­վոր են կոշտ և զտում հի­շեց­նող քայ­լեր

Ինչպես հայտնի է, Ամուլսարի ոսկու հանքի շահագործման հարցի շուրջ քննարկումների ծավալումը «Իմ քայլը» խմբակցության ներսում հակադիր կարծիքների բախման առիթ դարձավ: Քննարկումների ընթացքում տեղի ունեցավ կարծիքների լուրջ բախում. այն փուլում, երբ վարչապետի դիրքորոշումը հանքի շահագործման վերաբերյալ դրական էր, խմբակցության մի խումբ պատգամավորներ ուղղակի դեմ արտահայտվեցին այդ փաստին:

Մամուլում նույնիսկ տեղեկություններ շրջանառվեցին, թե վարչապետը խմբակցության անդամներից պահանջել է, որպեսզի «լոյալություն ցուցաբերեն, այլապես ստիպված է լինելու ցրել խորհրդարանը և նոր խորհրդարան ձևավորել»:

Ամենայն հավանականությամբ, հենց ստեղծված իրավիճակն էլ պատճառ դարձավ, որ ՔՊ-ական պատգամավոր Էդգար Առաքել յանը մանդատից հրաժարվելու դիմում գրեց:

Թվում էր, թե վարչապետ Փաշինյանի հորդորից հետո իրավիճակը պետք է հարթվեր, և սեպտեմբերի 3-ին տեղի ունեցած «Իմ քայլը» խմբակցության փակ նիստում կրկին անդրադարձ չէր լինի ներքին կարգապահական խնդիրներին, այլ այնպիսի հարցերի, ինչպիսիք, օրինակ՝ երկրի առջև ծառացած արտաքին մարտահրավերներն են, երկրորդ նախագահին կալանքի տակ պահելու հարցը, Ամուլսարի շահագործման խնդիրը և այլն: Սակայն որքան էլ տարօրինակ է՝ Ալեն Սիմոնյանը նիստից հետո նշել է, թե «նիստում Ամուլսարի հարցը չի քննարկվել, բայց քննարկման առարկա է դարձել խմբակցության աշխատելաոճը, լսվել են պատգամավորների դիտարկումները»: 

Ասվածը վկայում է այն մասին, որ խմբակցության ներսում դեռևս շարունակվում են տարակարծությունները և բևեռացումը:

«Իմ քայլը» խմբակցության ներսում խնդրահարույց է նաև Սասուն Միքայելյանի շուրջ ստեղծված իրավիճակը: Երբ վերջինս Աբովյանի քաղաքապետի ընտրություններում չպաշտպանեց իշխանության թեկնածուին և քննադատեց վերջինիս, դրանից հետո նրա նկատմամբ վերաբերմունքի փոփոխություն նկատվեց, և դրա արդյունքում է, որ Միքայել յանը, «Քաղաքացիական պայմանագրի» վարչության նախագահ լինելով, չընտրվեց նոր վարչության կազմում, թեև ՔՊ-ականները փորձեցին ցույց տալ, որ որևէ խնդիր չկա, տեղի են ունեցել ժողովրդավարական ընտրություններ:

Բայց բոլորի համար էլ պարզ էր, որ իշխանությունը պատժիչ քայլերի գնաց: Այսքանից հետո էլ զարմանալի չէ, երբ Ս. Միքայել յանը չի մասնակցում խմբակցության նիստերին: Եվ պատահական չէ, որ, ըստ տեղեկությունների, Միքայել յանը հրավիրված չի եղել նաև վերջին փակ հանդիպմանը:

Առանձին խոսակցության թեմա է առողջապահության նախարարի շուրջ ստեղծված վիճակը, երբ թիմի անդամները բացահայտ հարվածում են իրենց նախարարին:

Դժվար է ասել՝ դա վարչապետի գիտությա՞մբ է, թե՞ ինքնագործունեության արդյունք: Սակայն ակնհայտ է, որ այդ վիճակը անհետևանք չի կարող մնալ՝ կա՛մ նախարարի, կա՛մ «ինքնագլուխների» համար:

Այս իրավիճակում հետաքրքիրն այն է, որ իշխանական պատգամավորներից ոմանք տարբեր հարցերում եթե հակադրվում են վարչապետի, նախարարների կամ ընդհանուր թիմի կողմից տարվող քաղաքական ուղղությանը, ապա որպես իրենց դիրքորոշումն արդարացնող փաստարկ ներկայացնում են այն հանգամանքը, որ իրենք գործուն մասնակցություն են ունեցել անցած տարի տեղի ունեցած հեղափոխությանը, որը հնարավորություն է տալիս ազատ արտահայտել իրենց դիրքորոշումը:

Այնուամենայնիվ, իշխանական պատգամավորների այս դիրքորոշումը ընդունելության չի արժանանում գործադիր իշխանության ղեկավարի կողմից, քանի որ խմբակցության պատգամավորների ինքնուրույն քայլերը կարող են ծանր հետևանքներ ունենալ իշխանության վարկանիշի համար և ընդհուպ հանգեցնել երկպառակության:

Ուստի վարչապետը փորձում է պատժել իշխանության գծից շեղվող պատգամավորներին, որպեսզի այս պրոցեսը հետագա տարածում չստանա:

Ելնելով իրադրությունից՝ շատ հավանական է դառնում, որ «Իմ քայլը» խմբակցության վերջին փակ հանդիպումը ավելի շատ նախազգուշական բնույթ է կրել, որից հետո իշխանությունն իր ներսում անցնելու է կոշտ և զտում հիշեցնող քայլերի:

 

ԱՐԹՈՒՐ ԿԱՐԱՊԵՏՅԱՆ