Ի՞նչ է իրենից ներկայացնում շների գարեջուրը. «Փաստ»

«Փաստ» օրաթերթը գրում է

Ինչպիսի հրաշք ըմպելիք ասես գոյություն ունի աշխարհում, իսկ ալկոհոլային ոլորտը հատկապես բազմազան է: Այնուամենայնիվ, անգամ հիմա հայտնվում են գյուտարարներ, որոնք առաջարկում են նոր բաղադրություններով և նշանակության խմիչքներ: Այս ամենից անմասն չեն մնացել նաև մեր փոքրիկ ընտանի բարեկամները: Օրինակ՝ ստեղծվել է անսովոր գարեջուր շների համար: Ո՞վ կմտածեր, որ մի օր կենդանիների խանութներում շների համար գարեջուր կվաճառվի: Բայց այդպիսի անսովոր խմիչք ստեղծել հաջողվել է: Տարօրինակ է, բայց այդ ապրանքը պահանջարկ ունի, և որոշ ընտանի կենդանիների տերեր իրենց շների համար գարեջուր են գնում. ըստ երևույթին, այս կերպ նրանք ցանկանում են իրենց ամենամոտ ընկերոջ հետ գարեջուր խմել:

Սկզբից կենդանիների խանութների սեփականատերերը հրաժարվել են շների գարեջուր վաճառել, բայց հետո, տեսնելով, որ այն պահանջարկ ունի, հաշտվել են այդ մտքի հետ և սկսել վաճառել: Շատերն են նշում, որ իրենց շները մեկ անգամ փորձելով գարեջուր՝ սիրում են այն: Արտաքին տեսքով և տարողությամբ շների գարեջուրը չի տարբերվում սովորական գարեջրից, սակայն շան գարեջրի պատրաստման համար օգտագործվում է տավարի մսի, իսկ ավելի հաճախ՝ հավի մսի արգանակ: Քանի որ սպիրտը տոքսիկ է շների համար՝ շան գարեջուրն իրականում ոչ ալկոհոլային ըմպելիք է: Բացի դա, այդ գարեջուրը չի պարունակում գազի պղպջակներ, ուստի շները չեն ունենում միզուղիների խնդիրներ: Ըմպելիքն անվանել են գարեջուր միայն այն պատճառով, որ նրա բաղադրության մեջ մտնում է նաև գարու ածիկ, որը շների մազերին փայլ է հաղորդում:

Ընդ որում, հնարավոր չի եղել շրջանցել հավելանյութերը և կոնսերվանտները. գարեջուրը պարունակում է լիմոնաթթու, նատրիումի բենզոատ և կալիումի սորբենտ: Սակայն շնատերերին այդ ամենը չի անհանգստացնում. նրանք, գնելով այս գարեջուրը, պարզապես վայելում են ուրբաթ երեկոն մի գավաթ գարեջրով՝ իրենց սիրելի կենդանիների հետ «գավաթ գավաթի տալով»: Որոշ շնատերեր նշում են, որ երբ կենդանին հիվանդության կամ այլ պատճառով հրաժարվում է սննդից, գարեջուրը շատ է օգնում, քանի որ նրա մեջ մսային արգանակ է: Այնուամենայնիվ, չնայած նրան, որ այդ ըմպելիքը արգանակի համ ունի, որոշ շներ հրաժարվում են այն խմել և անգամ աշխատում են չմոտենալ դրան: Մասնագետները խորհուրդ են տալիս շնատերերին՝ տնային պայմաններում պատրաստել գարեջուր, քանի որ խանութներում վաճառվողները շատ թանկ են:

Ներկայում շների գարեջուր արտադրվում է ԱՄՆ-ում, Ճապոնիայում, Հոլանդիայում, Բելգիայում, Ավստրալիայում և անգամ Ռուսաստանում, չնայած հետխորհրդային երկրներում շան գարեջուրն այնքան էլ պահանջարկ վայելող ապրանք չէ, ի տարբերություն ԱՄՆ-ի և Եվրոպայի: Ամերիկյան Bowser Beer ընկերությունն առաջինն է աշխարհում 2010 թվականին արտադրել գարեջուր շների համար: Այդ կապակցությամբ էլ ընկերությունը ստացել է World Records Academy հատուկ մրցանակ:

ԿԱՄՈ ԽԱՉԻԿՅԱՆ

Մանրամասները՝ «Փաստ» օրաթերթի այսօրվա համարում