Հայաստանը չի նախատեսում սահմանափակել օդային հաղորդակցությունը Ռուսաստանի հետ

Սեղմեք ԱՅՍՏԵՂ, լրացրեք օնլայն հայտը և մոռացեք հոսանքի վարձի մասին

«Azerbaijan Arilines»-ի ինքնաթիռի կործանումից հետո Հայաստանի իշխանությունները չեն նախատեսում չեղարկել ավիաընկերությունների քաղաքացիական թռիչքները դեպի Ռուսաստան։

«Այս պահին նման բան նախատեսված չէ»,- «Ինտերֆաքս»-ին ասել է Հայաստանի տարածքային կառավարման և ենթակառուցվածքների նախարարության մամուլի խոսնակ Սոնա Հարությունյանը։
Նախարարությունը վերահսկում է Հայաստանի Քաղաքացիական ավիացիայի կոմիտեի գործունեությունը։

Հայկական ավիաընկերությունների ներկայացուցիչները «Ինտերֆաքս»-ին նաև հայտնել են, որ հանրապետությունից դեպի Ռուսաստան չվերթների իրականացման մեջ փոփոխություններ չկան, բոլոր չվերթներն իրականացվում են ըստ չվացուցակի։

Դեկտեմբերի 25-ին Ղազախստանում կործանվել է Բաքվից Գրոզնի թռչող «Azerbaijan Arilines»-ի ինքնաթիռը։

AZAL-ը դեկտեմբերի 28-ից չեղարկել է թռիչքները Բաքվից դեպի Ռուսաստանի 10 քաղաքներ՝ Գրոզնի, Մախաչկալա, Վլադիկավկազ, Միներալնիե Վոդի, Սոչի, Վոլգոգրադ, Ուֆա, Սամարա, Նիժնի Նովգորոդ և Սարատով։ Որոշումն ընդունվել է Ադրբեջանի քաղաքացիական ավիացիայի պետական գործակալության որոշման համաձայն։

«Որոշումը հիմնված է Embraer 190-ի կործանման հետաքննության նախնական արդյունքների վրա, ըստ որի կործանումը տեղի է ունեցել «ֆիզիկական և տեխնիկական արտաքին ազդեցության հետևանքով», և հաշվի է առնում «թռիչքների անվտանգության հնարավոր ռիսկերը»,-ասվում է AZAL-ի հայտարարության մեջ։ Թռիչքի դադարեցումն ուժի մեջ կմնա մինչև հետաքննության ամբողջական ավարտը։

AZAL-ը դեռ չի չեղարկել չվերթները դեպի Մոսկվա, Սանկտ Պետերբուրգ, Կազան, Աստրախան, Եկատերինբուրգ և Նովոսիբիրսկ։

Քիչ առաջ ղազախական Qazaq Air ավիաընկերությունը հայտարարել էր Աստանայից Եկատերինբուրգ թռիչքների դադարեցման մասին։ Սահմանափակումները գործելու են մինչև հունվարի 27-ը, դրանք սահմանվել են «ուղևորների և անձնակազմի անդամների անվտանգությունն ապահովելու համար՝ ելնելով դեպի Ռուսաստան թռիչքների ռիսկերի շարունակական գնահատման արդյունքներից», - պարզաբանել են ընկերությունում:

Դեկտեմբերի 26-ին իսրայելական El Al-ը հայտնել է, որ Թել Ավիվից Մոսկվա թռիչքները մեկ շաբաթով դադարեցվել են՝ «իրավիճակը գնահատելու համար»: Թռիչքները վերսկսելու որոշումը կկայացվի հաջորդ շաբաթվա ընթացքում։

 Հետևեք մեզ՝ այստեղ