Ինչպե՞ս կփոխվի իրավիճակը միջնաժամկետ հեռանկարում. «Փաստ»

«Փաստ» օրաթերթը գրում է.

iz.ru–ն «Հիշողությունը ոտնահարել են. կառավարությունը և ընդդիմությունը վիճաբանել են Ցեղասպանության տարելիցի շուրջ» վերնագրով հոդվածում գրում է, որ այս տարի Հայաստանում նշվել է Օսմանյան կայսրությունում տեղի ունեցած Հայոց ցեղասպանության 110-ամյակը: Այդ տխուր տարեթիվը կառավարության և ընդդիմության համար դարձել է ևս մեկ պատճառ հարաբերություններ պարզելու համար: Նիկոլ Փաշինյանի հակառակորդները Երևանում ջահերով երթ են անցկացրել, որի ընթացքում այրել են Ադրբեջանի և Թուրքիայի դրոշները, իսկ կառավարության ղեկավարը պատասխանել է՝ ասելով, որ նման գործողությունները չեն մոտեցնում խաղաղությանը: Հայաստանում ցեղասպանության մասին հիշողությունը ազգային գաղափար է: Երևանը և սփյուռքը տասնամյակներ շարունակ ձգտում են ցեղասպանության միջազգային ճանաչման: Արդյունքում, մոտ 30 երկիր, այդ թվում՝ Ռուսաստանը, Ֆրանսիան, Միացյալ Նահանգները, իսկապես այս կամ այն կերպ դատապարտել են այդ իրադարձությունները: Սակայն վերջերս Հայաստանի իշխանությունների առաջնահերթությունները փոխվել են: Ղարաբաղը կորցնելուց հետո պաշտոնյաները սկսել են խոսել Թուրքիայի հետ հաշտություն կնքելու մասին: Նման պայմաններում էլ ժամանակակից Հայաստանում այդ ողբերգության տարելիցը դարձել է կարևոր ներքաղաքական իրադարձություն:

Հայ քաղաքագետ Հրանտ Միքայելյանը կարծում է, որ ներկայիս հիշատակման օրը դարձել է կարևոր քաղաքական իրադարձություն։ «Ընդհանուր առմամբ, այդ միջոցառումները ավանդաբար հեռու են լինում քաղաքականությունից, դրանց սովորաբար մասնակցում են շատ տարբեր հայացքներ ունեցող մարդիկ։ Սակայն այժմ իրավիճակը զարգացել է այնպես, որ Ցեղասպանության մասին ցանկացած հիշատակում որոշակի իմաստով դարձել է ընդդիմադիր ժեստ։ Պետք է նշել, որ այս տարի սգո երթին ավելի շատ մասնակիցներ կային, քան նախորդ տարիներին, և դա նկատելի էր և՛ երկրի ներսում, և՛ դրսում։ Վերջին մեկ ամսվա ընթացքում սա արդեն երկրորդ ցավոտ հարվածն է Փաշինյանի թիմի դիրքերին, առաջինը ընդդիմադիրների հաղթանակն էր Գյումրու քաղաքապետի ընտրություններում։ Այսինքն, միտումը կայուն բնութագիր է ստանում»,- ասում է նա։

IMEMO RAS-ի Կովկասի սեկտորի ղեկավար Վադիմ Մուխանովն էլ նշել է, որ հայ հասարակությունը բացասաբար է արձագանքում Ցեղասպանության հարցը երկրորդ պլան մղելու փորձերին։ «Ցանկացած զանգվածային միջոցառում ցույց է տալիս, որ հայ ժողովուրդը չի ցանկանում մոռանալ այդ սարսափելի ողբերգությունը։ Սակայն գլխավոր հարցն այն է, թե ինչպե՞ս կփոխվի իրավիճակը միջնաժամկետ հեռանկարում։ Առաջներում դժվար էր պատկերացնել հայկական քաղաքական օրակարգը առանց Ղարաբաղյան հարցի, բայց հիմա ամեն ինչ այլ է, տեղի է ունեցել գիտակցության որոշակի «ապաղարաբաղացում»։ Չի կարելի բացառել, որ Ցեղասպանության թեմայով ևս կրքերի ինտենսիվությունը աստիճանաբար կնվազի»,- ընդգծել է նա։

Մանրամասները՝ «Փաստ» օրաթերթի այսօրվա համարում