ՎիվաՍելն ընդդեմ Յուքոմի և այլ հեռարձակողների

Հունիսի 10-ին մեկնարկեցին ֆուտբոլի Եվրոպայի առաջնության խաղերը, որին հայ ֆուտբոլասերները կարող են հետևել միայն «Առաջին ալիքի»՝ Հ1-ի եթերում:

Հեռարձակման այս սահմանափակման պատճառով սպառողների մի մեծ զանգված, որն օգտվում է Ucom, Rostelekom ընկերությունների ծառայություններից, չէին էլ պատկերացնի, որ «ՎիվաՍելի» պատճառով ոչ ավել, ոչ պակաս, ընդհանրապես կզրկվեն Եվրոպայի առաջնության խաղերին հետևելու հնարավորությունից:

Ասվածից, անշուշտ, պարզ դարձավ, որ «Եվրո-2016»-ի պաշտոնական հեռարձակողը Հանրային հեռուստաընկերությունն է, իսկ խաղերի ցուցադրման գլխավոր հովանավորը՝ «ՎիվաՍել-ՄՏՍ»-ը:

Ստացվում է, որ «ՎիվաՍելը» դուրս է եկել հայկական հեռահաղորդակցության ոլորտում գործունեություն ծավալող այլ ըներությունների դեմ նրանց փաստացի զրկելով ֆուտբոլային խաղերը հեռարձակելու հնարավորությունից: Այդ տեղեկությունը Ucom-ն իր պաշտոնական կայքէջում հրապարակել է հունիսի 13-ին, ինչը թույլ է տալիս ենթադրել, որ ընկերության համար էլ է այն անակնկալ եղել:

Ընկերության կողմից տարածած հաղորդագրությունում ասվում է.

«Սիրելի բաժանորդնե՛ր,

Ցանկանում ենք տեղեկացնել, որ համաձայն Հայաստանի Հանրային հեռուստաընկերության կողմից Ucom ընկերությանն ուղարկված նամակի՝ Հայաստանի հանրապետության ողջ տարածքով UEFA EURO 2016-ի բոլոր խաղերի ցուցադրման բացառիկ իրավունքը պատկանում է «Առաջին ալիքին»։ Վերոնշյալ նամակում մեզ տրամադրվել է նաև այդ մասին վկայող փաստաթղթի պատճենը։

Ելնելով նշված փաստից՝ պետք է նշենք, որ UEFA EURO 2016-ի խաղերը հասանելի չեն լինի մեր ընկերության կողմից տրամադրվող այլ հեռուստաալիքների միջոցով, ինչի համար հայցում ենք բոլորիդ ներողամտությունը»։

Ստացվում է, որ Հ1-«ՎիվաՍել» համագործակցության արդյունք ում մալուխային հեռուստահեռարձակում ապահովող այլ բաժանորդների մեծ մասին փաստացի զրկել են ընկերության ծառայություններից լիարժեք օգտվելու իրավունքից: Իհարկե այս ոլորտում գործող որոշ փոքր ընկերությունների թուլատրվել է ցուցադրել Եվրպայի խաղերը, սակայն այսպես ասած՝ գլխավոր մրցակիցները փաստացի զրկված են այդ հնարավորությունից: Բիզնեսը՝ բիզնես, բայց ամենասարսափելին այն է, որ այստեղ ոչ միայն անտեսվել են սպառողների շահերը, այլև ոտնահարվել նրանց իրավունքները:

Ստացվում է՝ սոցիալական պատասխանատվությունն ամեն ինչից վեր դասող «ՎիվաՍել-ՄՏՍ» ընկերությունը հարկ եղած դեպքում կարող է նաև մահացու հարված հասցնել թե´ իր մրցակիցներին, թե´ մրցակցի սպառողներին` հաշվի չառնելով, թե դրա հետևանքով սպառողների շրջանում ատելության ինչ մեծ ալիք կարող է բարձրանալ իր դեմ:

Բայց դա կարծես առանձնապես չի էլ անհանգստացնում խաղերի հեռարձակման գլխավոր հովանավոր՝ հայաստանյան բջջային կապի կարմիր օպերատորին, քանի որ հույս ունի, որ այլ ընկերությունների ծառայություններից օգտվող բաժանորդները, խաղերով տարված, դժվար թե նկատեն այդ նրբությունը: Եվ կարևորը՝ գնդակը դարպասում հայտնվի, իսկ թե ինչ ձևով, այս դեպքում նրան այնքան էլ չի հետաքրքրում: Անկեղծ ասած, «ՎիվաՍել-ՄՏՍ» ընկերությունից նման բան չէինք սպասի, բայց, ինչպես ժողովուրդն է ասում, մարմանդ գետից վախեցեք, նրա տարածը տարած է:

Արմինե Գրիգորյան