Ռուբեն Վարդանյանը նոր ֆինանսական բիզնես է գործարկում

Ռուբեն Վարդանյանը նոր ֆինանսական բիզնես է գործարկում: Նա կղեկավարի ռուս գործարարների, նրանց ժառանգների ու իրավահաջորդների կարողությունը, գրում է Past.am-ը՝ վկայակոչելով Forbes-ին:

Համաձայն կառավարման «Սկոլկովո» մոսկովյան դպրոցի հետազոտության, որի հոգաբարձուն «Տրոյկա Դիալոգի» (այժմ՝ «Սբերբանկ») նախկին հիմնական բաժնետեր Ռուբեն Վարդանյանն է, ռուս հարուստ գործարարների միջին տարիքը 48 է: Վերջիններիս 10-20 տարի անց հարկավոր կլինեն բիզնեսի ու կարողության փոխանցումը ձևակերպող ծառայություններ։

«Խոսքը ոչ միայն օլիգարխների, այլև միջին մակարդակի գործարարների մասին է: Նրանք ոչ միայն հարյուրավոր, այլև տասնյակ հազարավոր մարդիկ են»,- Forbes-ի հետ զրույցում հայտնել է Վարդանյանը:

2015թ. ամռանը Ռուբեն Վարդանյանը բացել է Advisors ընկերությունը՝ ի հավելումն family office-ի: Դրա աշխատանքը ղեկավարում է «Ռենեսանս Կապիտալի» նախկին նախագահ Ալեքսանդր Մերզլենկոն, ով պատասխանատու է առանցքային հաճախորդների հետ հարաբերությունների համար:

2015թ. գարնան վերջին Մերզլենկոն Phoenix Advisors-ի տնօրեն էր նշանակել իր նախկին ավագ գործընկեր, «Երրորդ Հռոմ» ընկերության ընտանեկան գրասենյակի ղեկավար Ալեքսեյ Ստանկևիչին։ Նրա պարտականությունների մեջ է մտնում գործարքների ու ակտիվների կազմավորումը, կապիտալների փոխանցման պլանավորումը:

Բիզնեսի կարևոր մասը պրոտեկտորատների (պաշտպանների) ստեղծումն է: Պրոտեկտորը (Վարդանյանի ընկերության ներկայացուցիչը) ներկայացնում է ժառանգների շահերը ընտանեկան բիզնեսում (ընկերություններ, հիմնադրամներ):

Վարդանյանը բացատրում է, որ այդ ծառայությունը հարկավոր է ընտանիքի ակտիվները պաշտպանելու համար: Նման բիզնեսի յուրահատկությունը պրոտեկտորի ու սեփականատիրոջ միջև վստահության բարձր մակարդակն է:

«Պրոտեկտորը, ըստ էության, անկախ անձ է, որը միջնորդ է ու ունի վետոյի կամ այլ որոշակի իրավունք, որը ազդում է որոշումների կայացման վրա»,- ասում է UFG Wealth Management-ի գործընկեր Դմիտրի Կլենովը: Նրա խոսքով՝ Ռուբեն Վարդանյանը լավ վարկանիշով ֆինանսիստ է, ու նա՝ որպես պրոտեկտոր, հետաքրքիր կլինի այն գործարարներին, ովքեր Վարդանյանին վստահում են:

Phoenix Advisors-ը կօգնի գործարարներին մշակել ռազմավարություն իր ակտիվների ու իրավահաջորդների շրջանակի նկատմամբ: Phoenix Advisors-ը կարող է մատուցել իր հաճախորդի ընկերություններում համակառավարչի ծառայություններ, եթե վստահում է Վարդանյանին ու վերջինիս թիմին կամ կարող է ներգրավել խոշոր միջազգային տների, օրինակ՝ Ռոտշիլդների ընտանիքից կամ շվեյցարացի բանկիրներից։

Վերոնշյալ մեխանիզմի գործարկման դեպքում ժառանգորդը ստիպված չի լինի սպասել ժառանգության փոխանցման իրավունքին, իսկ Վարդանյանի ներկայացուցիչները կարող են արագ մտնել տնօրենների խորհուրդ կամ կառավարման այլ մարմիններ՝ առաջնորդվելով իրավահաջորդի շահերի պաշտպանությամբ:

Վճարումը կախված կլինի ծառայությունների տեսակից, դա կարող է լինել միջնորդավճարի նման մի բան կամ բաժանորդային վճար։

Ստանկևիչն ասում է, որ հաճախորդները կգան հիմնական սեփականատիրոջ խորհրդատվությամբ: Մոտակա 7 տարում նրանց թիվը կսահմանափակվի 50 գործարարով, որոնց կարողությունը ավելի քան 100 մլն դոլար կկազմի:

Ռուբեն Վարդանյանի բիզնեսի մանրամասներին հնարավոր կլինի ծանոթանալ Forbes-ի սեպտեմբերյան համարում: