Տնից դուրս եկա ու վերջ. սկսվեց... իմ հասցեին ինչ ասես լսում եմ. Լիլիթ Մարտիրոսյան

Wnews.am-ը գրում է.

Կնոջ գեղեցկության ընկալումները ժամանակի հետ փոխվում են։ Հատկապես վերջին շրջանում ողջ աշխարհում կանացի գեղեցիկ կազմվածքի ընկալման նոր միտում է նկատվում. տիկնիկային բարակ իրան, լայն ազդրեր և մեծ հետույք։ Շատերն այսպիսի արդյունքի հասնելու  նպատակով մի քանի պլաստիկ վիրահատության են դիմում։

Wnews.am-ի  «Սարսափելի գեղեցիկ» խորագիրը կրող հարցազրույցների շարքի հաջորդ հյուրը Լիլիթ Մարտիրոսյանն է։ Այս աղջիկն ամեն ինչ անում է վերը նշված ստանդարտներին համապատասխանելու համար: Թեպետ վստահեցնում  է, որ որևէ վիրահատության չի դիմել, բայց նրա լուսանկարները մշտապես քննարկվում են և աղջկան մեղադրում են անբնական արտաքին ունենալու մեջ:

Լիլիթ Մարտիրոսյանն այժմ զբաղվում է մոդելավորմամբ, զուգահեռ պատրաստվում է սովորել նվագել  երաժշտական մի գործիքի վրա, որի մասին դեռ չի ցանկանում բարձրաձայնել։ Նա նվագում է նաեւ դաշնամուր։ Ինչպես ինքն է նշում, ունի մի քանի մասնագիտություն (իրավագետ, ծրագրավորող եւ դերասանուհի), սակայն դրանցից ոչ մեկն իրեն հոգեհարազատ չէ։

-Ինչպե՞ս են տղամարդիկ արձագանքում Ձեր արտաքինին։
-Անկեղծ ասած, իմ արտաքինը շատ շատերի համար տարօրինակ է, չեմ ժխտի այդ փաստը, որովհետեւ ես ինքս դա տեսնում ու շատ լավ գիտակցում եմ։ Կարծում եմ, որ եթե մարդն ունի տարբերվող արտաքին, թեկուզ եւ տարօրինակ, ուրեմն էությամբ շատ հետաքրքիր եւ արտասովոր անձ է։ Ինձ գրավում են այդպիսի մարդիկ, նրանց հետ երբեք չես ձանձրանա։

Արտաքինիս հասցեին հնչող արձագանքները միշտ էլ տարբեր են լինում։ Տնից դուրս եկա, վեեեերջ, սկսվեց… Այնքան հետաքրքիր, թե անհետաքրքիր, գեղեցիկ, թե տգեղ, զվարճալի, թե տխուր, ծիծաղելի, թե ցավալի արտահայտություններ են հնչում իմ հասցեին, բայց ես երբեք չեմ արձագանքում, պարզապես դրանք օրվա ավարտին գրի եմ առնում։ Կարելի է ասել, որ դրանք անեկդոտների մի շարք են, որոնք գուցե մի օր հրապարակեմ։

-Արդյո՞ք դիմել եք պլաստիկ վիրահատության։
-Երբեւէ վիրահատության չեմ դիմել, եթե դիմեմ, դրա մասին տեղյակ կպահեմ։
-Ի՞նչը կփոխեիք Ձեր արտաքինում։
-Դժգոհում եմ միայն քթիցս, որն էլ շուտով պատրաստվում եմ վիրահատել։

-Ըստ Ձեզ, ո՞րն է կանացիության ու վուլգարության սահմանը։
-Ըստ իս, որեւէ բանի համար այս կյանքում սահման չկա՝այդ թվում նաեւ կանացիության ու վուլգարության։ Յուրաքանչյուր ոք ինքն է իր առջեւ սահմաններ դնում այս կյանքում եւ ոչ ոք իրավունք չունի դիմացինին վարկաբեկել, վատաբանել կամ մեղադրել։ Կողքից, ինչպես նաեւ հետեւից, իհարկե, միշտ էլ հեշտ է խոսել։Պետք է գիտակցել, որ մեկ անգամ ենք ապրում։

-Սեքսուալ ասելով՝ի՞նչ եք հասկանում։
-Մեր օրերում, իհարկե, ոչ բոլորը, բայց մեծամասնությունը սեքսուալ ասելով հասկանում են մեծ հետույք, մեծ կրծքեր, մեծ շուրթեր կամ զգալի քանակությամբ դիմահարդարում, բայց իրականում դու սեքսուալ ես, եթե սեքսուալ են քո շարժումները, արտահայտվելուդ ձեւը, ձայնդ, միմիկաներդ, մտածելակերպդ եւ վերջապես, եթե աչքերդ կայծեր են արձակում։

-Որքա՞ն գումար եւ ժամանակ եք ծախսում Ձեր արտաքինի վրա։
-Եթե կինն ինքն իրեն գնահատում ու սիրում է, պետք է մշտապես հետեւի իրեն՝անկախ ամեն ինչից։ Իհարկե ես հասկանում եմ, որ ապրելու պայմանները մեր օրերում շատ դժվար են, բայց հավատացեք, որ նույնիսկ ամենամինիմալ եւ դժվար պայմաններում կարող ես խնամված եւ գեղեցիկ տեսք ունենալ, պարզապես երբեք չպետք է ալարես եւ ամեն բան կստացի։
Իմ արտաքինի վրա որեւէ գլոբալ փոփոխություն չեմ արել  եւ երբեւէ մեծ գումարներ չեմ ծախսել։ Մեծ ուշադրություն եմ դարձնում մարմնիս ու մաշկիս խնամքին։ Մշտապես հաճախում եմ մարզասրահ, մաշկս խնամում եմ տնային պայմաններում՝բնական միջոցներով։ Մշտապես կարդում եմ օգտակար խորհուրդներ այդ ամենի հետ կապված, ավելի շատ հին ժամանակաշրջանի խնամքի միջոցներն եմ ուսումնասիրում եւ կիրառում, որոնք ամենաադրյունավետն են։ Մշտապես սիրում եմ արտաքինիս վրա ինչ-որ փորձարկումներ անել, նույնիսկ այնպիսի բաներ, որ, ինձ թվում է, միայն ես եմ անում։

-Ինչպե՞ս եք վերաբերում Ձեր հասցեին հնչող քննադատություններին։
-Ես չափից դուրս համբերատար, ներողամիտ ու լավատես մարդ եմ։ Ցանկացածին էլ լավ հասկանում եմ, փորձում եմ ամեն վատ բանի մեջ միայն լավը տեսնել, երբեք ինձ թույլ չեմ տվել որեւէ մեկին վատաբանել, նեղացնել կամ քննադատել, բայց մարդիկ բոլորն էլ տարբեր են։ Ես չեմ կարող որեւէ մեկին ասել՝ փոխիր մտածելակերպդ։ Բացասական մեկնաբանություններ եղել են, կան եւ միշտ կլինեն, պարզապես կցանկանայի, որ մարդիկ ավելի բարի եւ կամեցող լինեն։ Միեւնույնն է, դիմացինին քննադատելով կամ վատաբանելով՝քո մոտ ոչինչ չի փոխվի, պարզապես ինքդ քեզ ավելի «կտգեղացնես», իսկ դիմացինի մոտ ծիծաղ կառաջացնես… Ժպտում եմ միշտ՝անկախ ամեն ինչից ու ամեն բան լավ է լինում։