Ողջ ճշմարտությունը Շուշան Պետրոսյանի մասին. լուսանկարներ

Wnews.am-ը գրում է.

Wnews.am-ը շարունակում է ներկայացնել հայտնի կանանց։ Այս անգամ ներկայացնում ենք ՀՀ վաստակավոր արտիստ, ԱԺ պատգամավոր Շուշան Պետրոսյանին։

Շուշան Պետրոսյանը ծնվել է 1967թ. սեպտեմբերի 23-ին Երեւանում:

1987թ. ավարտել է Երեւանի Փանոս Թերլեմեզյանի անվան գեղարվեստի ուսումնարանի գեղանկարի ֆակուլտետը: Գեղանկարի եւ գծագրության ուսուցիչ: 1993թ. ավարտել է Երեւանի գեղարվեստի պետական ակադեմիայի գրաֆիկայի ֆակուլտետը: Գեղանկարիչ-գրաֆիկ է :

1989 -1991թթ. աշխատել է «Արձագանք» թատրոն-ստուդիայում (Մետրո թատրոն) աշխատել է հագուստի եւ բեմի նկարիչ: Ձեւավորել է 3 ներկայացում` «Առասպելական հավերժություն», «Անտիգոնե», «Տերն ու ծառան»: 1994 -1997թթ. աշխատել է Երգի պետական թատրոնում: 1996թ-ից Հայաստանի պետական ֆիլհարմոնիայի մենակատար է, 2002-2003թթ.` Երեւանի կինոյի եւ թատրոնի պետական ինստիտուտի դասախոս:

2012թ. մայիսի 6-ին ԱԺ պատգամավոր է ընտրվել համամասնական ընտրակարգով Հայաստանի Հանրապետական կուսակցությունից: ԱԺ գիտության, կրթության, մշակույթի, երիտասարդության եւ սպորտի հարցերի մշտական հանձնաժողովի անդամ:

2005թ. Բնության եւ հասարակության մասին միջազգային ակադեմիայի ակադեմիկոս է:

2006թ. արժանացել է ՀՀ վաստակավոր արտիստի կոչման:

2008թ. պարգեւատրվել է Երեւանի քաղաքապետի ոսկե մեդալով եւ ՊՆ «Վազգեն Սարգսյան» շքանշանով:

2014թ. ԼՂՀ նախագահ Բակո Սահակյանի կողմից պարգեւատրվել է Երախտագիտության մեդալով։

Արժանացել է մի շարք երաժշտական մրցանակների` 1993թ.` գլխավոր մրցանակ («Շարմ Շոու» միջազգային փառատոն), 1996թ.` «Տարվա լավագույն երգչուհի» («Ասուպ» մրցանակաբաշխություն), 2000թ.` «20-րդ դարի հայ աստղ» («Աստղ» փառատոն), 2000թ.` «Լավագույն կին կատարող» («Անուշ» մրցանակաբաշխություն, ԱՄՆ), 2004թ. «Անկախ Հայաստանի լավագույն ձայն» («Կռունկ» փառատոն), 2009թ.` «Դիվա» մրցանակ (երգի ամենամյա փառատոն, ԱՄՆ):

Ամուսնացած է, ունի երկու զավակ:

ՇՈՒՇԱՆ ՊԵՏՐՈՍՅԱՆԻ ԸՆՏԱՆԻՔԸ

Շուշան Պետրոսյանի ամուսինը Արման Հարությունյանն է։ Նա այժմ աշխատում է իրավագիտական ոլորտում, իսկ  նախկինում աշխատել  է ՀՀ ոստիկանության կազմակերպված հանցավորության դեմ պայքարի 6-րդ վարչությունում։

Նա 2008թ.-ին պարգեւատրվել է Երեւանի քաղաքապետի ոսկե մեդալով եւ ՊՆ «Վազգեն Սարգսյան» շքանշանով։

Շուշան Պետրոսյանի ավագ որդին` Գրիգորը, ուսանող է, իսկ կրտսերը` Գագիկը, դպրոցական։

«Կարծում եմ որևէ բնագավառում, որևէ ոլորտում ամեն բան կստացվի, ժամանակն էլ կբավարարի, երբ ընտանիքում ամեն բան կարգին է, բոլորը առողջ են, մթնոլորտը առողջ է, կա փոխադարձ ըմբռնում ու իրար օգնել կա, այդ դեպքում, նույնիսկ հոգնությունից սպառված, պատրաստ ես գազօջախի մոտից չհեռանալ»,-Wnews.am-ին տված հարցազրույցում ասել է երգչուհին, ով ամուր ընտանիքի նախապայմանը համարում է փոխադարձ հարգանքը։

Շուշան Պետրոսյանի մայրը հայ օպերային երգչուհի, Արաքս Մանսուրյանն է, հայրը՝ գեղանկարիչ Սամվել Պետրոսյանը։

ԵՐԱԺՇՏԱԿԱՆ ԳՈՐԾՈՒՆԵՈՒԹՅՈՒՆ

Շուշան Պետրոսյանը հայաստանյան երգարվեստի որտում բավականին հայտնի երգչուհի է։ Նա մասնակցել է ՀՀ-ում և արտասահմանում հայկական սփյուռքի ներկայացուցիչների համար կազմակերպված համերգների, հանդես է եկել մենահամերգներով։ Նրա երգացանկում մեծ թվով երգեր նվիրված են հայրենիքին։ Հատկապես հայտնի է նրա երգած «Երազ իմ երկիր Հայաստան» և «Սպարապետ» երգերը։ Վերջին երգը երգչուհին նվիրել է Վազգեն Սարգսյանին։

Երգչուհին պարբերաբար մենահամերգներ է տալիս Հայաստանի սահմանամերձ համայնքներում, զորամասերում։

Իր երաժշտական գործունեության ընթացքում արժանացել է բազմաթիվ մրցանակների, այդ թվում՝

1993 թ. գլխավոր մրցանակ («Շարմ Շոու» միջազգային փառատոն),
1996 թ. «Տարվա լավագույն երգչուհի» («Ասուպ» մրցանակաբաշխություն),
2000 թ. «20-րդ դարի հայ աստղ» («Աստղ» փառատոն),
2000 թ. «Լավագույն կին կատարող» («Անուշ» մրցանակաբաշխություն, ԱՄՆ),
2004 թ. «Անկախ Հայաստանի լավագույն ձայն» («Կռունկ» փառատոն),
2009 թ. «Դիվա» մրցանակ (երգի ամենամյա փառատոն, ԱՄՆ)։

Ի դեպ, տարիներ առաջ երգչուհին հանդիպել է աշխարհահռչակ երաժիշտ Սթիվի Ուանդերին։ Հանդիպումը տեղի է ունեցել վերջինիս նախաձեռնությամբ, քանի որ նա շատ է հավանել երգչուհու ձայնի տեմբրը։

ՔԱՂԱՔԱԿԱՆ ԳՈՐԾՈՒՆԵՈՒԹՅՈՒՆ

2012թ. մայիսի 6-ին Շուշան Պետրոսյանը Հայաստանի Հանրապետական կուսակցության նախընտրական ցուցակով ընտրվել է ՀՀ ԱԺ պատգամավոր։

Քաղաքական դաշտ մտնելու նրա որոշումը միանշանակ չընդունվեց. շատերը նրան սկսեցին քննադատել։

 

«Քննադատում են մարդիկ, որոնք այս կյանքում ինչ-որ քայլ իրենց սեփական շահի համար են անում, հանուն սեփական ամբիցիաների: Ինչո՞ւ գնացի Ազգային Ժողով, գնացի, որովհետեւ պրոբլեմներ շատ կան` հատկապես մշակույթի ասպարեզում: Երեւի քննադատում են նրա համար, որ ես շատերին նման չեմ, ես իմ տեսակն ունեմ եւ դրա համար դառնում եմ ոչ ընդունելի եւ ոչ սիրելի: Ցավոք սրտի, մեր երկրում անհատականություններին շատ չեն սիրում, միայն երկիրը սիրող մարդը կարող է այդ ամենին դիմակայել»,- քննադատություններին այսպես է արձագանքում Շուշան Պետրոսյանը։

Ի դեպ, նա սիրում է պատգամավորի աշխատանքը.

«Ես սիրում եմ պատգամավորի իմ աշխատանքը եւ շատ ուրախ եմ, որ ունեմ մեկ այլ ասպարեզում եւս մշակույթին, դրանով իսկ` ժողովրդին ծառայելու հնարավորություն»,- ասում է նա:

 

ՀԱՅՐԵՆԻՔ, ՀԱՅՐԵՆԱՍԻՐՈՒԹՅՈՒՆ, ՀԱՅՈՑ ԲԱՆԱԿ

«Կարծում եմ՝ պետք է հայրենասիրությունից միայն չխոսել: Հայրենիք սիրելու համար միջոց պետք չէ, պարզապես պետք է հայերենը, հայոց պատմությունը դպրոցներում խորացված դասավանդել, միջավայրից պիտի դեն շպրտել թրքահոտ ռաբիս երաժշտությունը: Թերեւս պետք է երեխային սովորեցնել հայերեն մտածել եւ հայեցի ապրել:

Բանակը պետք է սիրել, ուղղակի սիրել: Բանակը պետություն է պետության մեջ, որտեղ կողք կողքի կանգնում են տարբեր խառնվածքի տեր եւ տարբեր դաստիարակություն ստացած պատանիներ, որոնք ինքնահաստատվելու փորձ են անում, ինչը բնական է այդ տարիքում, երբեմն էլ ուժեղը թույլի հաշվին, տգետը` ուսյալի: Սա նույն աշխարհի մոդելն է: Բայց կա մի պարզ ճշմարտություն` երբ թշնամին գլուխ է բարձրացնում, իրար հետ աքլորակռիվ անող այդ պատանիները մոռանում են իրենց տղայական վեճերը եւ միավորվում հակառակորդի դեմ: Դրական բան ասել բանակի մասին նշանակում է ոչինչ չասել: Արցախյան ազատամարտի հերոսները, փառք եւ պատիվ բոլորին, անկախ հայրենիք կերտած, պատերազմում հաղթած հերոսներն են, եւ չէինք կարծում, թե կգա նոր սերունդ, որը նույն ոգով, նույն նվիրումով ու արիությամբ կգնա նույն ճանապարհով, մարտի դաշտում կռիվ կտա, կզոհվի, կվիրավորվի, բայց կհաղթի… Որեւէ տեղաշարժ չկա, հայոց բանակը կայուն է ու միշտ հզոր»,- ասում է երգչուհին։

ՖԵՅՍԲՈՒՔՅԱՆ ԳՐԱՌՈՒՄՆԵՐ, ՔՆՆԱԴԱՏՈՒԹՅՈՒՆՆԵՐ

Շուշան Պետրոսյանը բավականին ակտիվ է «Ֆեյսբուք» սոցիալական ցանցում։ Նրա կողմից թողնված մեկնաբանությունները բավականին բուռն են ընդունվում հանրության կողմից եւ ակտիվորեն քննարկվում։

Երգչուհուն զայրացնում են հատկապես Հայոց բանակի վերաբերյալ բացասական գրառումները, որոնց էլ նա բուռն է արձագանքում։

«Չի կարելի դատարկամտությամբ սոցցանցերը մրոտեն` հօգուտ թշնամու: Երկրին խնամքով պետք է վերաբերվել: Երկրի ներսում ինչ անում եք` արեք, բայց սոցցանցերում պետք չէ ամեն ինչ գրել, առավել ևս բանակի թեմայով, որովհետև բանակն այս պահին թեժ և չափազանց գերզգայուն վիճակում է գտնվում»,- կարծում է երգչուհին։