Ինչ է առաջարկում պետությունը փոշիացվող գործազուրկների նպաստների փոխարեն

Այն բանից հետո, երբ կառավարությունում որոշեցին գործարկության նպաստները փոխարինել այլ ծրագրերով, շատերը դժգոհեցին. «երկու կոպեկ էր էլի ստանայինք» ոճով: Իրականում այդ «երկու կոպեկը» կամ 16 հազար դրամը, որ 4 ամիս ստանում էր գործազուրկի կարգավիճակ ստացած անձը, կենսական որեւէ հարց չէր լուծում: Այսինքն, բյուջեին տրվող գումարները ըստ էության փոշիանում էին` առանց սոցիալական արդյունք ապահովելու եւ առարկայական արդյունք տալու:

Կառավարությունը որոշեց այդ գումարներն օգտագործել ավելի նպատակային` ոչ միայն չնվազեցնելով այլեւ ավելացնելով այդ նպատակով հատկացված գումարի չափը: Օրինակ 2014-ից Արմավիրի մարզում ներդրվեց և փորձարկվեց ժամանակավոր զբաղվածություն ապահովող ծրագիր, որի արդյունքները գնահատելուց հետո սկսեց իրականացվել ողջ հանրապետությունում: Խոսքը գյուղատնտեսական նշանակության հողի սեփականատերերին՝ նրանց տրվող գյուղատնտեսական սեզոնային զբաղվածության աջակցության ծրագրի մասին է: Այսինքն, այն գյուղացին, ով ունի գյուղատնտեսական նշանակության հող, բայց ֆինանսական դժվարություններ, կկարողանա պետական աջակցությամբ մշակել իր հողակտորը և ստանալ արդյունք, լուծելով իր սոցիալական խնդիրները:

Այս տարվա հոկտեմբերի 15-ին կռավարությունը հաստատեց աշխատանքի և սոցիալական հարցերի նախարարության ներկայացրած եւս մեկ` Տավուշի մարզում հասարակական աշխատանքների համար գործազուրկների ժամանակավոր զբաղվածության ապահովման փորձնական ծրագիրը: Այդ նպատակով պետական բյուջեի պահուստային ֆոնդից հատկացվեց 60 մլն դրամ 30 ծրագրի համար: Մեկ ծրագրի առավելագույն արժեքը 2 մլն դրամ: Այս ծրագրերով Տավուշի մարզի 30 համայնքներում՝ յուրաքանչյուր համայնքից 10-15 գործազուրկների համար կապահովվի ժամանակավոր` 2 ամսվա զբաղվածություն: Այդ անձանց հետ համայնքի ղեկավարը կկնքվի ժամանակավոր աշխատանքային պայմանագիր` յուրաքանչյուր աշխատած օրվա համար հատկացնելով 5000 դրամ: Դրա դիմաց ծրագրում ընդգրկվածները օժանդակ բանվորական աշխատանքներ կիրականացնեն 6 հիմնական ոլորտներում.

1) սոցիալական ենթակառուցվածքի օբյեկտների (դպրոց, մանկապարտեզ, բուժհիմնարկ, մանկատուն, ծերանոց և այլն) հարակից տարածքների բարեկարգում (սանիտարական մաքրման, կանաչապատման, ծառատնկման և այլն)

2) միջհամայնքային և ներհամայնքային ճանապարհների, խճուղիների, մայթերի, այգիների, պուրակների, խաղահրապարակների բարեկարգման, լուսավորման ապահովում, սանիտարական մաքրում, կանաչապատում, ծառատնկում

3) արտակարգ իրավիճակների հետևանքների վերացման օժանդակ աշխատանքներ,

4) պետական պատմական հուշարձանների, թանգարանների, եկեղեցիների հարակից տարածքների բարեկարգում

5) գերեզմանատների ցանկապատման, բարեկարգում

6) բնակչության համար պաշտպանական նշանակություն ունեցող ինժեներական կառույցների շինարարական աշխատանքներ:

Փաստորեն, այս ծրագրով, բացի սոցիալական խնդիր լուծելուց եւ գործազուրկների համար ժամանակավոր զբաղվածություն ապահովելուց, մարզի բնակավայրերում որոշակի կենսական նշանակության համայնքային խնդիրներ են լուծվում: Այսինքն, ի տարբերություն նպաստի, հատկացված գումարները մի կողմից աշխատանք կապահովեն մարդկանց համար, մյուս կողմից` արդյունք նրանց բնակավայրերի համար: