Հրանուշ Խառատյան. «Ասելիք չունենալ և բացահայտ դեպքից հետո ասել` շոկի մեջ եմ, կենցաղային դիրքորոշում է». «Փաստ»

«Փաստ» օրաթերթը գրում է.

Իշխանությունը զբաղված է ոչ թե ծրագրերի, այլ հրատապ, օպերատիվ խնդիրների արագ լուծմամբ, ինչը զգալի չափով դժվարացնում է, որ հանրությունը հասկանա կառավարության ընդհանուր տեսլականը: Խոսելով երկրում տիրող իրավիճակի, ներքաղաքական զարգացումների ու նոր իշխանության գործողությունների մասին` «Փաստ»-ի հետ զրույցում նման տեսակետ հայտնեց ազգագրագետ Հրանուշ Խառատյանը: 

«Խոսքը ծրագրային տեսլականի, ուղղությունների, տնտեսական առաջընթացի կամ արդարության խնդրի մասին է: Այո, անշուշտ, օպերատիվ գործողությունները կարևոր են: Կարևոր են կոռուպցիայի վերացման ուղղությամբ իրականացվող գործողությունները: Բայց ի՞նչ ծրագրով, ինչպե՞ս պետք է նվազեցվի, հետո սահմանափակվի, հետո էլ հնարավոր լինի ընդհանրապես վերացնել այն բոլոր մեխանիզմները, որոնք կարող են նոր կոռուպցիոն իրավիճակի տանել: Սա ծրագրային խնդիր է: Առայժմ չի երևում, թե ինչպիսին պետք է լինեն այդ մեխանիզմները: Իհարկե, սա մեկ կամ երկու ամսում լուծվելիք խնդիր չէ, բայց կարևոր է»,-ընդգծեց մեր զրուցակիցը: 

Որպես կարևոր խնդիր` նա առանձնացրեց նաև տնտեսության ազատականացումը: Իսկ որպես հրատապ խնդիր` ազգագրագետը կարևորեց Ընտրական օրենսգրքի փոփոխությունը:

«Ընտրական օրենսգրքի կարգավորումը հրատապ, բայց բարդ խնդիր է: Ես զարմանում եմ, երբ խոսվում է, թե հնարավոր է սեպտեմբերին ընտրություն անցկացնել: Զարմանում եմ նաև այն պատճառով, քանի որ այս պահի դրությամբ ընտրատեղամասերում աշխատելու գործնական գիտելիքներ ունեցող մարդիկ հիմնականում կոռուպցիոն սխեմաներին տիրապետողներն են: Նրանք ինչպե՞ս պետք է փոխվեն: Բացի այդ` չէ՞ որ նրանց համար ահռելի գումարներ են ծախսվել, դասընթացներ են կազմակերպվել: Անկախ նրանից, թե դրան զուգահեռ գործնականում ինչպես են վարվել, գիտելիք կրողն իրականում իրենք են: Հիմա երկու-երեք ամսում այդ բոլորն այլ մարդկանց ուղղակի անհնար է սովորեցնել»,-նշեց նա:

Ազգագրագետը խոսեց նաև վերջին բացահայտման համատեքստում ՀՀԿ-ականների պահվածքի, ինչպես նաև հասարակական տրամադրությունների մասին: 

«ՀՀԿ-ն այսօր անընդհատ խոսում է նոր իշխանության «ռեպրեսիոն» գործողությունների մասին: Ակնարկներ են անում, թե այն ամենը, ինչն իրականացվում է կոռուպցիան հայտնաբերելու և դրա դեմ պայքարի սխեմայում, օրենքի շրջանակներից դուրս է: Իսկ թե որո՞նք են «ռեպրեսիոն» գործողությունները` հստակ ձևակերպված չէ: Նման դիրքորոշումներ հնչեցին Մանվել Գրիգորյանի հետ կապված բացահայտումների շուրջ: Իմ գնահատմամբ` գործողություններն օրենքի շրջանակներում էին: Եթե «ռեպրեսիվ գործողություններ»-ի մակարդակով արված ընդհանուր ձևակերպումներից բացի ՀՀԿ-ն այլ փաստարկ չունի, ապա նման ձևակերպումները քաղաքական հայտարարության պես մի բան են ստացվում: Ըստ իս` ասելիք, բացատրություն չունենալ և բացահայտ դեպքից հետո ասել` ես շոկի մեջ եմ, չգիտեի, կենցաղային դիրքորոշում է: Քաղաքական դիրքորոշումն էլ հնչեցրած «ռեպրեսիվ գործողություններն» են, որոնց վերաբերյալ ևս փաստարկ չունեն»,-ասաց Հրանուշ Խառատյանը:

Ըստ ազգագրագետի` նորմալ է, որ այս փուլում նոր իշխանության վերաբերյալ հասարակության մեջ նաև քննադատական և դատապարտող կարծիքներ կան, բայց այլ խնդիր կա:

«Խնդիր է, թե այդ կարծիքների հետևում որքան գիտելիք կա: Մի բան է, երբ մարդը կյանքում մածուն չի տեսել, բայց մածունի մասին կարծիք է հայտնում, բոլորովին այլ բան` երբ փաստարկներով գիտի, թե իր ասածի հիմքում ինչ է: Գիտեք` ուղղակի նախկինում այնքան չարդարացված ու չիրականացած սպասելիքներ են եղել, և հիմա մարդիկ նույն սպասելիքների վերաբերյալ լուծումների իրենց տարբերակն են առաջարկում: Երբեմն ռոմանտիկ կարող են լինել, երբեմն` ոչ իրատեսական, երբեմն էլ հիմքում ոչ թե երկրի, այլ անձի խնդիր կարող է լինել: Այս ամենը նորմալ է: Նորմալ եմ գնահատում նաև «ՀՀԿ-ական ռևանշիզմը», թեև ՀՀԿ-ն, որպես կուսակցություն, գնալով ավելի նեղ վիճակի մեջ է ընկնում: Իհարկե, հիմա էլ են հայտարարություն անում զուտ հայտարարություն անելու համար, բայց այս պահին մի քիչ փաստարկված պետք է բացատրեն` ինչպե՞ս եղավ, որ այսքան տարի իշխանության լինելով` այդ ամենը չտեսան: Ինչպե՞ս եղավ, որ տասը տարի պայքարեցին կոռուպցիայի դեմ, բայց այդքան փնտրելուց հետո, էլի չէին գտնում: Այդքան պայքարելուց իրենք գոնե գտե՞լ են: Հարցերն իրենց առաջ են: Կարծում եմ` պատասխաններ պատրաստվում են»,-եզրափակեց Հ. Խառատյանը: 

Շարունակությունը՝ «Փաստ» օրաթերթի այսօրվա համարում