«Մենք մեր տանն ենք ու հավերժ այստեղ ենք լինելու». Սամվել Խալաթյան

Past.am

Հայկական զինուժն արդեն չորրորդ օրն է՝ շարունակում է հաղթական հարվածներ հակառակորդի մարդկային ուժի և զինտեխնիկայի ուղղությամբ: Զինվորների մարտական ոգին բարձր է, թիկունքում բոլորս համոզված ենք՝ արդեն հաղթել ենք:

Դրամատուրգ, ՀՀ մշակույթի վաստակավոր գործիչ, Վանաձորի պատվավոր քաղաքացի Սամվել Խալաթյանը նշում է՝ ճակատագրով ենք դատապարտված ժամանակ առ ժամանակ կենաց և մահու պայքար մղել:

«Պատերազմ է: Շահն ու աշխարհակալության ժանտ էությունը ժողովրդավարության, մարդասիրության զգեստներով պաճուճած աշխարհի մի անկյունում, այնտեղ, ուր հազար և ավելի տարի է, ինչ հնագույն, փոքրաթիվ, քաղաքակիրթ մի ժողովուրդ հանուն իր ապրելու իրավունքի գոյապայքարի մեջ է, դարձյալ պատերազմ է: Քոչվոր, դիվային ցեղի թափթփուկները, թիկունք և օգնական ունենալով իրենց սնող արնաբերան Գորշ գայլին, դարձյալ հայաջինջ նկրտումներ ունեն: Իսկ մարդասիրության կեղծ զգեստներով պաճուճված աշխարհը կուրացել ու խլացել է: «Մարդասեր» հեռավորների վարքն արտառոց չէ, նրանց միշտ կանխիկ շահն է հետաքրքրել: Նրանց նավերը երբեք մեր լեռների վրա չեն բարձրացել: Բայց երբ կուրացել ու խլացել են անգամ նրանք, ովքեր բարեկամ են ձևանում, որոնց իսկ շահից չի բխում մեր պարտությունը, քանզի առանց մեզ՝ խաղաղասեր, տոկուն բնիկներիս, իրենք կհայտնվեն Մեծ Թուրանի երախում, լուրջ մտորելու տեղիք է տալիս: Նրանք, մարաղ մտած, սպասում են, թե այս մահուկենաց կռվում ո՞վ-ո՞ւմ, ինչքա՞ն, որպեսզի հետո որոշեն՝ ումից ինչքան:

Մենք ճակատագրով ենք դատապարտված ժամանակ առ ժամանակ կենաց և մահու պայքար մղել: Մենք գնալու տեղ չունենք: Սա մեր Սուրբ հայրենիքի մասունքված մասն է, որտեղ անթեղել ենք մեր հազարամյակների պատմությունն ու մշակույթի կենարար այն պաշարը, որոնցից սնվել են տասնյակ հնագույն ցեղեր ու ժողովուրդներ: Այստեղ են մեր նախնիների մասունքները, այստեղ են մեր զավակների օրորոցները, մենք մեր տանն ենք ու հավերժ այստեղ ենք լինելու:

Մենք ճակատագրով ենք դատապարտված գոյապայքարել ու հաղթել: Եվ կհաղթե՛նք: Մաքառումով կհաղթենք, ցավալի կորուստներով կհաղթենք, ապրելով, գոյատևելով կհաղթենք, քանզի այս հազարամյա գոյապայքարի ներկայիս դրվագը սոսկ երկու ազգի միջև սանձազերծված զինամարտ չէ, այլ՝ մարդկության արյան ծարավ գազաններին միայնակ դիմագրավող դյուցազունի կռիվ:

Ուստի, զա՛րկ գազանին, հայ զինվոր, զարկ, բազկիդ մատաղ լինեմ: Մի սպասիր ու չընկճվես, թե՝ հեռավորների ու մոտավորների նավերը չեն բարձանում մեր լեռները: Մեր Սուրբ լեռան՝ Արարատի վրա, խարիսխ է գցվում այն ժամանակ, երբ համայն մարդկությանն է փրկել պետք: Դու այդ Սուրբ լեռան պաշտպանն ես, զա՛րկ»,-Past.am-ի հետ զրույցում ասաց Սամվել Խալաթյանը:

Լուսինե Առաքելյան